د امریکا غبرګون؛ له طالبانو سره تر هوکړې وروسته هم د افغان ځواکونو ملاتړ کوو

امریکا تازه ویلي چې له طالبانو سره به د سولې تر هوکړې وروسته هم د افغان ځواکونو ملاتړ ته ادامه ورکوي. امریکا وايي، له طالبانو سرد سولې هوکړې لاسلیک به له افغان ځواکونو د دفاع او ملاتړ په برخه کې د امریکا پر ژمنو کوم اغېز ونه لري. د افغان سولې لپاره د امریکا د بهرنیو چارو وزارت ځانګړي استازي دغه څرګندونې د رویټرز د یوه راپور په غبرګون کې کړې دي.
رویټرز تېره ورځ د دوو طالب قومندانانو په حواله راپور ورکړی دی، چې امریکا به د سولې تر هوکړې وروسته د افغان ځواکونو له ملاتړه لاس واخلي. دغو طالب قومندانانو رویټرز ته ویلي وو، دا د سولې د هوکړې برخه ده، چې بهرنيان په تېره امریکایان به د افغان ځواکونو ملاتړ پرېږدي او د طالبانو یا حکومت ترمنځ جګړه کې به مداخله نه کوي. دغه طالب قومندانانو دا هم ویلي چې ډېر ژر به امریکایان پر طالب وسله والو د بریدونو د درېدو امر وکړي چې ورسره جوخت به طالبان هم پر امریکايي ځواکونو بریدونه ودروي.
طالب قومندانانو له رویټرز سره په خبرو کې په زور د حکومت د نیولو خبره هم کړې ده. دغه خبري آژانس ته یوه طالب چارواکي د نامه نه ښودلو په شرط ویلي: ((موږ به د افغان حکومت پر وړاندې خپلې جګړې ته ادامه ورکوو، موږ غواړو واک په زور له حکومته ونیسو)).
بل پلو د افغان سولې لپاره د امریکا د بهرنیو چارو وزیر د رویټرز پر دغه راپور غبرګون ښودلی دی. نوموړي په تازه ټوېټونو کې ویلي، ځینې رسنۍ د پروپاګندو او بې اساسه خبرونو په خپرولو سره د سولې روان بهیر زیانمنوي. د ده په خبره، دغه ډول راپورونه اساس نه لري او امریکا به د افغان ځواکونو دفاع ته ادامه ورکوي. زلمی خلیلزاد وايي: ((په پروپاګندو پسې مه ګرځئ، زه به خبره درته واضح کړم. موږ به له افغان ځواکونو خپل ملاتړ ته ادامه ورکوو. د سولې تر تړون مخکې مو هم د افغان ځواکونو دفاع کړې او تر تړون وروسته به یې هم دفاع کوو)).
خلیلزاد وایي، ډېر داسې مسایل شته دي چې د طالبانو او امریکا ترمنځ ورباندې بحث نه کېږي؛ بلکې په بین الافغاني مذاکراتو کې به خبرې ورباندې کېږي. نوموړی وايي: ((د افغانستان ټوله راتلونکې او اړوند مسایل په بین الافغاني مذاکراتو کې تر بحث لاندې نیول کېږي)).
د امریکا او طالبانو ترمنځ نهم پړاو خبرې روانې دي. ویل کېږي چې د دواړو لورو ترمنځ پر مهمو مسایلو هوکړې تیارې شوې دي؛ خو تر دې دمه د لاسلیک په تمه دي. بلخوا د دغو خبرو د ګونګوالي او د هوکړو په اړه د معلوماتو نه لرلو خلکو او سیاسیونو ته اندېښنې پیدا شوې دي. تازه یوه امریکايي سناتور ویلي چې امریکا دې خپل ملي امنیت د طالبانو ته په واک کې نه ورکوي. لیندسي ګراهام ویلي وو، چې طالبان لا په افغانستان کې د ترهګرو ډلو پر وړاندې د جګړې وړتیا نه لري، نو د بهرنیو ځواکونو له وتلو سره سم ښايي په افغانستان کې یو ځل بیا ترهګرې ډلې د پښې ځای پیدا کړي.
روسیې هم په تازه څرګندونو کې ویلي چې له طالبانو سره سوله به په افغانستان کې د جګړې د پای ته رسېدو سبب نه شي. په کابل کې د روسیې سفیر الکساندر مانتیتسکي ویلي وو، په افغانستان کې یوازې طالبان جګړه نه کوي؛ بلکې ډېرې ډلې دي چې وسله یې اخیستې او یوازې له طالبانو سره په خبرو ټولې ډلې له جګړې نه په شا کېږي. هغه دا اندېښنه هم ښودلې وه، چې ښايي ځینې طالبان هم له امریکا سره د سولې هوکړه ونه مني او خپلې جګړې ته ادامه ورکړي.
له دې اندېښنو سره سره امریکا لا هم له طالبانو سره د هوکړې په اړه معلومات له رسنیو سره نه دي شریک کړي، خو وایي، په دې برخه کې پرمختګونه ډېر دي او ډېر ژر به افغان سوله د پرمختګونو شاهده وي.