د ننګرهار په سره رود او بټي کوټ کې چاڼیز عملیات پيل شوي

چارواکي وايي، د ننګرهار بټي کوټ او سره رود ولسواليو کې د وسله والو د ځپلو په موخه د ګډو افغان ځواکونو له لوري چاڼيز عمليات پيل شوي. د مسوولينو په وينا، ياد عمليات به په دغو ولسواليو کې د وسله والو تر له منځه وړلو پورې دوام ولري. په ختيځ کې د سيلاب قول اردو وياند جګړن محمد هارون يوسفزي ويلي، د ملي اردو ځواکونو په مشرۍ، ملي پوليسو، عامه نظم او سرحدي ځواکونو له لوري دا عمليات پرون پيل شول. هغه زياته کړه، سيمه ييز پوليس او ولسي پاڅونوال هم په دغو عملياتو کې ملاتړي دي او دغه راز د هوايي او توپچي ځواک ملتيا به هم د اړتيا په وخت کې ولري. دی وايي، د دغو عملياتو موخه په سره رود او بټي کوټ کې د وسله والو ځپل او راتلونکو ولسمشريزو ټاکنو ته زمينه برابرول دي.