د طالبانو او امریکا ترمنځ توافق نهايي شوی دی. د معلوماتو له مخې، د طالبانو او امریکا ترمنځ تېره ورځ په دوحه کې خبرې روانې وې او په دې خبرو کې د هوکړې ټول موارد نهایي شوي دي. تر دې وړاندې امریکا او طالبانو دواړو ویلي وو، چې په نهم پړاو مذاکراتو کې به د طالبانو او امریکا ترمنځ هوکړه نهایي او لاسلیک شي. خو اوس ویل کېږي چې هوکړه نهايي شوې ده؛ خو تر دې دمه د دواړو لورو ترمنځ لاسلیک شوې نه ده.
سره له دې چې د طالبانو او امریکا ترمنځ خبرې لا هم له مرموز حالت سره مخ دي او له خلکو پټې مخ ته وړل کېږي، خو دواړه لوري د پرمختګ او مثبتو ګامونو د اوچتولو خبره کوي. طالبانو او امریکا تېره ورځ لس نیمې بجې په دوحه کې خبرې پيل کړې او سرچینو رسنیو ته ویلي چې دواړو لورو د سولې په لاسلیکېدونکې هوکړه کې راتلونکي موارد نهایي کړي دي. کابل نیوز ته یوې سرچینې ویلي چې طالبانو او امریکا هوکړه نهایي او د رسمي لاسلیک لپاره یې تیاره کړې ده.
سرچینه کاږي چې هوکړه به دلته نه؛ بلکې په یوه بل محفل کې چې په هغه کې به د هوکړې ضمانت کوونکي هم حاضر وي، لاسلیک کړل شي. سرچینه کاږي: ((دغه لومړنۍ توافقنامه ده، چې د دواړو خواوو ترمنځ لاسلیک کیږي، خو اصلي توافقنامه به په یوه ستره غونډه کې، چې نړیوال تضمین کوونکي به هم پکې ګډون لري، لاسلیک کیږي)).
بلخوا الجزیرې شبکې بیا د خپلو سرچینو په حواله لیکلي، چې امریکا او طالبانو یو بل ته ګډ ضمانتونه او ژمنې ورکړې دي. الجزیره دا هم وايي چې توافق د نهايي کېدو په حال کې دی، خو دواړو لورو پر یو لړ مهمو مسایلو هوکړه کړې ده. د سرچینې په خبره، طالبانو له امریکا سره ژمنه کړې چې دوی ته به د وتلو خوندي لارې برابروي او امریکایان به په امنه توګه کولی شي له افغانستانه خپل ځواکونه وباسي. د دې تر څنګ، طالبانو دا ژمنه هم کړې چې هېچا ته به د بل چا پر وړاندې د افغان خاورې د کارولو اجازه ورنه کړي. سرچینه وايي: ((طالبانو په توافقنامه کې ژمنه کړې چې امریکایانو ته به د وتلو خوندي لاره ورکوي او ضمانتونه یې ور کړي، چې هیڅ ډلې ته به د چا خلاف د افغانستان د خاورې د استعمالولو اجازه نه ورکوي)).
د دې تر څنګ، طالبانو او امریکا پر نورو مواردو هم هوکړه کړې ده، خو ویلي یې دي چې د افغانستان د راتلونکي حکومت مسئله به په بین الافغاني مذاکراتو کې حل کېږي. وسله والو طالبانو تر دې وړاندې هم ویلي چې د اوربند او راتلونکي حکومت مسئله به په بین الافغاني مذاکراتو کې تعقیبوي؛ خو امریکا بیا په ځلونو ویلي چې له طالبانو سره به د اوربند په ګډون، پر ډېرو مواردو هوکړه کوي. خلیلزاد په ځلونو ټینګار کړی و، چې یا به له طالبانو سره پر ټولو مواردو هوکړه کېږي او یا به پر هېڅ مورد هم توافق نه کېږي.
بلخوا په افغان حکومت کې لا هم د بین الافغاني مذاکراتو لپار پر لېږل کېدونکي پلاوي اختلاف موجود دی. ویل کېږي چې تازه د ځینو کسانو نومونه له دغه لېست ایستل شوي او پر ځای یې نوي کسان اضافه شوي دي. د سولې په چارو کې د دولت وزارت بیا وايي، چې پلاوی نهايي شوی دی او دمګړی دغه پلاوی پر دې کار کوي، چې له طالبانو سره څه ډول د افغانانو او افغان حکومت په استازیتوب مذاکرات مخ ته یوسي.
