ایکسپریس ټربیون ورځپاڼه: پاکستان پر طالبانو ټینګار کړی چې تشدد کم کړي

د افغان سولې لپاره د مذاکراتو د پیل هڅې یو ځل بیا چټکې شوې دي. په همدې موخه د امریکا د دفاع وزیر هم پرون په یو ناڅاپي سفر کابل ته راغلی دی. هغه ویلي، کابل ته یې د سفر موخه یو سیاسي جوړجاړي ته رسېدل دي. په ورته وخت کې د پاکستان ایکسپریس ټربیون ورځپاڼې تېره میاشت اسلام اباد کې د طالبانو او پاکستاني چارواکو ترمنځ له شویو خبرو څخه د باخبره سرچینو له خولې ویلي، پاکستان پر طالبانو ټینګار کړی دی چې اوربند او یا هم حد اقل د تشدد کچه راکمه کړي. په پاکستان کې د افغان چارو څارونکی او خبریال طاهر خان بیا وایي، د طالبانو او امریکا ترمنځ د خبرو اساسي ټکی یو هم دا و چې طالبان باید اوربند وکړي خو د هغه په خبره، فکر نه کوي چې پاکستان دې پر طالبانو په همدې موخه فشار راوړی وي. راپور کې وړاندې راغلي، پاکستان طالبانو ته ویلي چې که چېرته غواړي له امریکا سره خبرې بیا پیل شي نو اوربند دې اعلان کړي او یا دې هم د تشدد کچه راټیټه کړي خو طالبانو تر اوسه پاکستان ته په دې اړه ډاډ نه دی ورکړی.