د لومړنیو پایلو د اعلان په ځنډ کې د ټاکنو خپلواک کمېسیون ناتوانۍ پر دغه کمېسیون نیوکې ډېرې کړې دي. سره له دې چې د ټاکنو خپلواک کمېسیون باید لومړنۍ پایلې اوس اعلان کړې وای، خو تر دې دمه یې روښانه کړې نه ده چې لومړنۍ پایلې به څه وخت اعلانېږي. وړمه شپه د امریکا سفارت د ټاکنو د پایلو پر ځنډ غبرګون وښود او د دغه کار هرکلی یې وکړ. سفارت ویلي وو چې شفافیت تر سرعت ډېر مهم دی، نو که د شفافیت لپاره ټاکنې ځنډول کېږي، دوی ورسره موافق دي. بلخوا ټاکنیز ټیمونه بیا د کمېسیون پر دې کم کاریو او ځینو نورو ستونزو نیوکې لري.
د ټاکنو خپلواک کمېسیون غړو څو جلسې کړې دي، خو تر دې دمه نه دي بریالي شوي چې د لومړنیو پایلو د اعلان لپاره ورځ مشخصه کړي. دوی وایي چې د ځینو تخنیکي ستونزو له امله یې کارونه ځنډېدلي دي، چې له دې امله د لومړنیو پایلو اعلان هم له ځنډ سره مخ شوی دی. د ټاکنو خپلواک کمېسیون د مهالوېش له مخې، ټاکل شوې وه چې لومړنۍ پایلې تېره شنبه د تلې په (۲۷مه) اعلان شي، خو اوس دغه اعلان ځنډېدلی دی. د ټاکنو کمېسیون تازه ویلي چې په څو راتلونکو ورځو کې به پایلې اعلان کړي. د دغه کمېسیون غړې رحیمې ظریفي ویلي، دوی نه غواړي د هغه څه په اړه خبرې وکړي چې دقیق شوي نه دي. نوموړې وايي: ((موږ وخت لرو، ډېر ژر به پایلې اعلان کړو. دقیقه نېټه نه ده معلومه، خو تر څو ورځو ځنډ وروسته به لومړنۍ پایلې د افغانستان له خلکو سره شریکې کړو)).
سره له دې چې د ټاکنیزو ټیمونو ځینو ناظرینو د ټاکنو له ځنډه هرکلی کړی دی، خو ځینې ناظرین بیا د کمېسیون پر کمکارۍ او فلجوالي نیوکه کوي. د ثبات او همپالنې ټیم غړو تېره ورځ په یوه خبري کنفرانس کې وویل، چې کمېسیون په خپلو کارونو کې بریالی نه دی او ځینې بنسټونه یې په چارو کې مداخله کوي. د دوی په خبره، د ټاکنو کمېسیون تخنیکي برخې ته ځینې امنیتي کسان ننوتي دي او هلته یې لاسوهنې هم کړې دي. دوی زیاتوي چې دا مسئله باید په جدي توګه وڅېړل شي. د ثبات او همپالنې ټاکنیز ټیم غړي علي احمد عثماني ویلي: ((ځینې امنیتي کسان د کمېسیون تخنیکي برخې ته دننه شوي او په بایومټریک دستګاوو کې یې لاسوهنه کړې ده)).
د ثبات او همپالنې ټیم دغه غړي همدا راز د ټاکنو کمېسیون د دارالانشا د مشر، د امنیتي مرستیال خوشال سادات او د کمېسیون د امنیتي مسوول د دندو د ځنډولو غوښتنه هم کړې ده. نوموړي ویلي، بایلونکی ټیم غواړي چې د لوبې قاعده بدله کړي او لوبه د ځان په ګټه پای ته ورسوي.
د ثبات او همپالنې ټیم دغه راز د ولسمشر غني ټاکنیز ټیم ته په اشارې وايي، چې دوی ناکام شوي دي او هڅه کوي چې هېواد د بحران لور ته بوځي. د دوی په باور، حاکم ټیم هڅه کوي چې هر څه د ځان په ګټه وڅرخوي او له ټولو دولتي امکاناتو د ځان د بریا لپاره کار واخلي.
هغه د رایې شمېرنې په برخه کې پر شفافیت ټینګار کړی او زیاته کړې یې ده، دوی به په ټول توان د خلکو له پاکو رایو دفاع وکړي؛ خو د کورنیو چارو وزارت ویاند نصرت رحیمي وایي، دا ادعا چې ګوندې امنیتي ځواکونو د ټاکنو کمېسیون په داخلي کړنو کې مداخله کړې ده، په بشپړه توګه غلطه ده او دوی یې په کلکه ردوي. د ده په خبره، امنیتي ځواکونه قانون ته ژمن دي او د ټاکنیزو پروسو په امنیت کې یې په پوره امانتدارۍ ونډه اخیستې ده.
د ټاکنو د نامعلوم برخلیک په اړه اندېښنې داسې مهال دي، چې لا هم د ولسمشریزو ټاکنو د لومړنیو پایلو د اعلان دقیقه نېټه نه ده مشخصه شوې. ځینې نوماندان بیا وایي چې لومړی پړاو ټاکنې ګټونکی نه لري، نو دویم پړاو ټاکنې هم ښایي د هوا د سړښت له امله تر راتلونکي پسرلي وځنډېږي. له دې ډلې کسانو یو هم ګلبدین حکمتیار دی چې تر دویم پړاو ټاکنو پورې د موقت حکومت غوښتنه هم کوي.
