د ملګرو ملتو د امنیت شورا: د ننګرهار د وروستۍ پېښې له عاملینو سره باید حساب وشي

د ملګرو ملتو د امنیت شورا د ننګرهار په هسکه مېنه کې پر یوه جومات د شوي برید په تړاو تازه بیان کې ویلي، د دا ډول ترهګریزو بریدونو له ترسره کونکو، تنظیمونکو او تمویلونکو سره باید حساب وشي. د ملګرو ملتونو د امنیت شورا د دوشنبې پرون په یوه اعلامیه کې د هسکې مېنې د جو درې په جومات کې د جمعې د ورځې برید وحشیانه او ناځوانمردانه بللی او پر ټولو هېوادونو یې ټینګار کړی چې نړیوالو قوانینو ته د خپلې ژمنتیا پر بنسټ دې، د دا ډول پېښو مخنیوي کې د افغانستان له دولت او اړوند چارواکو سره فعاله همکاري وکړي. د ملګرو ملتونو د امنیت شورا په بیان کې ددې شورا غړو یو وار بیا پرې دې ټینګار کړی چې د ترهګرۍ هر ډول او بڼه نړیوالې سولې او امنیت یو جدي ګواښ دی. تر دې مخکې د ملګرو ملتونو د عمومي منشي انتونیو ګوترش په شمول د نړۍ یو شمېر نورو سیاستوالو او د بشري حقونو مدافع بنسټونو د ننګرهار وروستی خونړی برید غندلی و. د تېرې جمعې په ورځ په دې برید کې لږ تر لږه اویا تنه لمونځ کونکي ووژلشول او تر شپیتو زیات نور ټپیان شول.