سېمینار: احمد شاه بابا تر امریکا ۲۹ کاله مخکې جمهوریت جوړ کړی

په پېښور کې د احمد شاه بابا د مړینې د ۲۴۷م تلین په مناسبت غونډه جوړه شوې وه. دا سيمينار چې د پښتو ژبې، ادب، هنر او کلتور په برخه کې فعالې ټولنې (پوهه فاونډېشن) جوړ کړی و، پکې لیکوالانو، شاعرانو، پښتنو سیاستوالو، مدني فعالانو او د پوهنتون یو شمېر محصلینو ګډون کړی وو. د یاد بنسټ مشر، څېړونکي او لیکوال ایاز مندوخیل وویل، احمدشاه بابا هغه څوک و، چې ۲۷۲ کاله مخکې یې په افغانستان کې جمهوري نظام جوړ کړی و. د هغه په خبره په هغه وخت کې په سیمه او نړۍ کې داسې نظام چې احمدشاه بابا درلود موجود نه و. هغه زیاته کړې، بابا تر امریکا ۲۹ کاله مخکې د خړ جمهوریت(جرګې) له لارې باچا شوی دی. هغه دغه راز د بابا په اړه هغه دعوې هم رد کړې چې نوموړی پکې ظالم او یرغلګر بلل شوی دی. شاعر او سیاستوال وکیل شهاب خټک بیا وویل چې احمد شاه بابا د یو عام عسکر په حیث خپل ژوند پیل کړ خو بیا یې په خپل جرئت، زړورتیا او ذهانت سره داسې مقام ته ځان ورساوه چې اوس هم پښتانه پرې ویاړي.