افغان حکومت د مسکو په غونډه کې ګډون نه کوي

ټاکل شوې نن په مسکو کې د افغانستان د سولې په مسله د امریکا، روسیې، چین او پاکستان د حکومتونو استازي په یوه مشورتي ناسته کې ګډون وکړي. د افغان حکومت یوه باوري سرچینه وايي چې د حکومت استازي به په مسکو کې د افغانستان په هکله د امریکا، روسیې، چین او پاکستان د استازو په ګډه مشورتي ناسته کې ګډون ونه کړي. دغې سرچینې ویلي چې دا ناستې د دغو هېوادونو خپلمنځي مشورتي ناستې دي او د افغان حکومت له اړخه په کې څوک برخه نه اخلي. ټاکل شوې په ناسته کې د افغان سولې لپاره د امریکا ځانګړی استازی زلمی خلیلزاد هم برخه واخلي. تر اوسه د دې ناستې د اجنډا په اړه جزئیات نه دي معلوم. د مسکو دا مشورتي ناسته په داسې حال کې جوړيږي، چې چین هم د افغانانو یوې خپلمنځي ناستې جوړېدو ته چمتووالی نیولی.