د ټاکنو په کمېسیون کې د اختلافاتو له امله، د لومړنیو پایلو اعلان ځنډېدلی دی. د ټاکنو خپلواک کمېسیون له ژمنو سره سره، د لومړنیو پایلو د اعلان دقیقه نېټه لا هم نه ده معلومه او دغه کمېسیون بریالی نه شو چې خپلې ژمنې عملي کړي. ولسمشریزې ټاکنې د تلې په شپږمه نېټه تر سره شوې او ټاکل شوې وه چې پایلې یې د تلې میاشتې په ۲۷مه اعلان شي، خو د یادو ټاکنو پایلې تر ننه نه دي اعلان شوې. بلخوا څارونکي بنسټونه او ټاکنیز ټیمونه د ټاکنو خپلواک کمېسیون پر دغه ځنډ او غیر قانوني کړنو نیوکې کوي.
سره له دې چې د ټاکنو خپلواک کمېسیون د لومړنیو پایلو د اعلان کره نېټه نه ده په ډاګه کړې، خو داسې شک هم شته چې ښايي لومړنۍ پایلې ان دری اونۍ وځنډېږي. د ټاکنو خپلواک کمېسیون غړی اورنګزیب وایي، د کمېسیون دارالانشا ورته وړاندیز کړی چې لومړنۍ پایلې دری اونۍ وروسته اعلان شي، خو دوی نه ده ورسره منلې. د اورنګزیب په خبره، دری اونۍ خورا ډېر وخت دی او باید پایلې ژر اعلانې کړل شي.
اورنګزیب پرون په خبري غونډه کې وویل چې نن (یکشنبه) ښايي د لومړنیو پایلو د اعلان لپاره نېټه مشخصه شي؛ خو دا چې کمېسیون به د یوې نېټې پر مشخصولو هوکړې ته ورسېږي که نه، لا معلومه نه ده. اورنګزیب وايي: ((دارالانشا چې کوم مهالوېش موږ ته وړاندیز کړی و، په هغه کې یې دری اونۍ وخت په پام کې نیولی و. دا نو ډېر اوږد وخت و او د واقعیتونو پر بنسټ نه و جوړ شوی. موږ وویل چې دا وخت باید کم کړل شي. دا ډېر اوږد وخت دی)).
د مهالوېش له مخې، د تلې د شپږمې نېټې لومړنۍ پایلې باید د همدې میاشتې په اوه ویشتمه نېټه اعلان شوې وای، خو په بایومټریک الو کې د ستونزو، مرکزي سرور ته د معلوماتو په لېږد کې ستونزو او ځینو نورو خنډونو لومړنۍ پایلې وځنډولې. سره له دې هم کمېسیون هیله لري چې نن وکړی شي د لومړنیو پایلو د اعلان نېټه مشخصه کړي. د ټاکنو کمېسیون کمېشنر اورنګزیب دا هم وایي چې مرکزي سرور ته د رایو د لېږد لړۍ هم بشپړه شوې ده او ټول معلومات مرکزي سرور ته لېږدول شوي دي. له دې وروسته به د درملوګ کمپنۍ دغه رایې محاسبه کوي او پایلې به کمېسیون ته ورکوي.
د ټاکنو خپلواک کمېسیون دا هم وايي چې تر ۱،۹ میلیون ډېرو وګړو رایه ورکړې ده او دوی دغه رایې ټولې مرکزي سرور ته لېږدولې دي. بلخوا د ثبات او همپالنې ټاکنیزه ډله بیا وایي چې په ټاکنو کې د یو میلیون او ۷۹۵ زره رایې کارېدلې دي. د دوی په خبره، د کمېسیون له لوري اعلان شوې شمېرې ښایي سمې نه وي او دوی ته د حیرانتیا وړ دي.
بلخوا د دولت ساز ټاکنیز ټیم ناظرین بیا وایي چې د ټاکنو خپلواک کمېسیون باید ژر تر ژره لومړنۍ پایلې اعلان کړي. د دوی په خبره، د قانوني او مننې وړ دلایلو له راوړلو پرته د ټاکنو د پایلو په اعلان کې ځنډ ورته د منلو نه دی او باید ژر تر ژره اعلان کړل شي.
تر دې وړاندې پر ټاکنو ځینو څارونکو بنسټونو هم د پایلو په اعلان کې ځنډ راتلل غیر قانوني او د ستونزو زېږوونکی بللی و. دوی وايي، څومره چې پایلې ځنډېږي، ټاکنیزو ټیمونو ته موقع په لاس ورکوي چې ناندرۍ جوړې کړي او خلک پر ټاکنیزو کمېسیونونو بې باوره کړي. د ټاکنو د لومړنیو پایلو د اعلان ځنډ په داسې حال کې دی، چې ځینو هېوادونو لکه امریکا او اروپايي ټولنې د ټاکنو په اعلان کې ځنډ ته په ښه سترګه کتلي وو او په خبره یې شفافیت باید د سرعت قرباني نه شي.
