د ټاکنو خپلواک کمېسیون د لومړنیو پایلو اعلان وځنډاوه. کمېسیون هغه طرزالعمل او مهالوېش تر پښو لاندې کړ چې پخپله یې جوړ کړی و. کمېسیون وایي چې د ځینو ستونزو له امله اړ شوي چې د لومړنیو پایلو اعلان وځنډوي، خو تر ډېره یې د دغو ستونزو په اړه وضاحت نه دی ورکړی. بلخوا ټاکنیز ټیمونه بیا د ټاکنو د کمېسیون له لوري د لومړنیو پایلو د اعلان پر ځنډ نیوکه کوي. دوی وايي، د کمېسیون دغې پرېکړې اندېښمن کړي دي.
د ټاکنو خپلواک کمېسیون په لومړي سر کې د خپل کار له پیل سره سم وویل چې ولسمشریزې ټاکنې به په خپله ټاکلې نېټه تر سره کېږي او تر هغه وروسته به یې لومړنۍ پایلې هم پخپل وخت اعلان شي. سره له دې چې ولسمشریزې ټاکنې څو ځله وځنډول شوې، خو اوس کمېسیون پر دې هم بریالی نه شو چې لومړنۍ پایلې په خپل وخت اعلان کړي. د ټاکنو خپلواک کمېسیون د تېرې میاشتې ۲۷مه د لومړنیو پایلو د اعلان لپاره مشخصه کړې وه، خو له دې نېټې د لسو ورځو تر تېرېدو ورسته یې تازه اعلان کړی، چې ټاکنې به د روانې لړم میاشتې په ۲۳مه اعلان کړي.
د ټاکنو خپلواک کمېسیون رییسې حوا علم نورستانۍ تېره ورځ په یوه خبري کنفرانس کې د خبرو پر مهال وویل، چې د لړم ۲۳مه د ټولو اړخونو په مشورو او تایید ټاکل شوې ده او په هېڅ صورت به بدلون نه پکې راوستل کېږي. نورستانۍ وايي: ((ما، کمېشنرانو او زموږ ټول ټیم له دارالانشا سره یو ځای په دې کار وکړ، چې د تخنیکي ستونزو مخه هم ونیسو او هغه نېټه چې نن مو اعلان کړه، بیا نقض نه شي)).
نوموړې وویل، د ټاکنو د لومړنیو پایلو د اعلان د ځنډ لامل دا دی، چې ټاکنیز ټیمونه د رایو او ځینو مسایلو په اړه شکایتونه لري. همدا راز د بایومټریک په دستګاوو کې ستونزې او د دې مسایلو د سپړلو تر څنګ یې له درملوګ کمپنۍ سره ځینې ستونزې د دې لامل شوې دي، چې د لومړنیو پایلو اعلان وځنډېږي.
سره له دې چې د ټاکنو خپلواک کمېسیون د شفافیت او سرعت لپاره د میلیونونو ډالرو په ارزښت بایومټریک آلې واخیستې او له درملوګ کمپنۍ سره یې هوکړه وکړه او په ټاکنو کې یې تخنیکي او الکترونیکي مسایل ډېر کړل، خو بیا هم دغه کمېسیون بریالی نه شو چې خپل مهالوېش عملي کړي. د ټاکنو خپلواک کمېسیون کمېشنر مولانا عبدالله وايي، ځینې تخنیکي ستونزې او تر څنګ یې د کمېسیون پر کمزوري فعالیت سربېره، په ځنډ د موادو رالېږد، ځینې اعتراضونه او د درملوګ کمپنۍ ناغيړي، د لومړنیو پایلو د اعلان د ځنډ لاملونه دي.
بلخوا ټاکنیز ټیمونه بیا د ټاکنو خپلواک کمېسیون پر کمکارۍ او د لومړنیو پایلو د اعلان پر ځنډ نیوکه کوي. دوی وایي، د اعلان ځنډېدو اندېښمن کړي دي او دوی چې کومه موده ټاکلې، خورا ډېره او غیر منطقي ده. د ثبات او همپالنې ټاکنیز ټیم یوه غړي محمد یونس نو اندېش وویل، دوی ته یوازې یوه اونۍ ځنډ د منلو دی، تر دې زیات وخت په هېڅ صورت د منلو وړ او منطقي نه ښکاري. نوموړی وايي: ((له ۷ تر ۸ ورځو ځنډ یو طبیعي خبره وه، ځکه د همدې ورځو په اوږدو کې د معلوماتو ملي مرکز ته ډېټا ونه لېږدول شوه، خو له دې د زیاتو ورځو ځنډ موږ ته د اندېښنې وړ دی)).
د ولسمشر غني په مشرۍ دولت ساز ټیم هم وايي، څومره چې د لومړنیو پایلو اعلان ځنډېږي، دومره اندېښنې پاروي. د دغه ټیم د غړو په خبره، د ټاکنو خپلواک کمېسیون باید هر څه له مهالوېش سره سم مخ ته وړي وی او په دې توګه یې د ولس غوښتنو ته ځواب ویلی وای. دوی وايي، اوسنی ځنډ فساد او په هېواد کې ناندریو ته زمینه برابرولی شي.
