د ولسمشر غني د ملي امنیت سلاکار تېره ورځ په کابل کې د سولې د اووه ماده ییزې طرحې په اړه معلومات ورکړل. په دې وروستیو کې افغان حکومت د سولې یوه طرحه خپره کړې ده او وایي چې د دې طرحې په عملي کېدو سره په هېواد کې دایمي او با عزته سوله راتللی شي. حکومت ټینګار کوي چې له دې طرحې پرته د امریکا او طالبانو ترمنځ هر ډول هوکړه په افغانستان کې د جګړې د پای ته رسېدو په مانا نه، بلکې د جګړې د یوه بل پړاو د پیل په مانا ده. حمدالله محب تېره ورځ پر همدې مسئله ولس ته معلومات ورکړل او د سولې طرحه یې د افغانستان د ژغورنې لار وبلله.
وروسته له دې چې د سولې لپاره د امریکا، روسیې او چین له لوري نوې هڅې پيل شوې، افغان حکومت هم په دې برخه کې خپل فعالیت وښود. ارګ د سولې په اړه د ولسمشر غني یوه طرحه خپره کړه او په هغه کې د سولې لپاره د حکومت سرې کرښې مشخصې شوې دي. تېره ورځ د ولسمشر د ملي امنیت سلاکار هم د سولې د طرحې په اړه معلومات ورکړل. د هغه په خبره، افغان حکومت تر دې وړاندې د سولې لپاره کوم شرط نه درلود، خو اوس یې لومړی شرط دا دی چې طالبان باید د رښتینې سولې لپاره یوه میاشت اوربند وکړي.
حمدالله محب دغه راز وویل، چې د دوی د سولې هڅې او د طرحې پیل له امریکا او ناټو پيلېږي، وروسته له پاکستان سره خبرې کوو او په درېیم قدم کې به له طالبانو سره مخامخ خبرې کېږي. محب وایي چې له امریکا سره به د سولې او د هېواد د راتلونکې په اړه خبرې کوي او له پاکستانه به دا غواړي چې د طالبانو له ملاتړه لاس واخلي. هغه ټينګار کړی چې د پاکستان تر ملاتړ پرته طالبان یوه ورځ هم جګړه نه شي کولی او تر هغه چې د پاکستان ملاتړ وي، طالبان به هم جګړې کوي.
محب دغه را وایي چې د طالبانو او پاکستان ترمنځ اړیکې باید واضح شي. ده په خپلو پرونیو څرګندونو کې په واضح توګه طالبان د پاکستان لاسپوڅي وبلل او په خبره یې، دوی د دغه هېواد د ګټو لپاره جګړه کوي. د محب په خبره، پاکستان باید د طالبانو له ملاتړه لاس واخلي او طالبان هم باید د سولې د تامین لپاره له پاکستان او نورو ترهګرو ډلو سره خپلې اړیکې پرې کړي. محب وايي: ((دا یوازې افغانانو ته نه، بلکې ټولې نړۍ ته روښانه ده چې طالبان د پاکستان لاسپوڅي دي او که د پاکستان مرسته نه وي، جګړې ته دوام نه شي ورکولای. طالبان باید وضاحت ورکړي چې له پاکستان سره څه اړیکه لري. که له افغانانو سره مذاکرات کوي، نو باید افغان وژنه بس کړي)).
محب طالبان هم په څو ډلو وویشل او په خبره یې، که طالبان رښتیا سوله غواړي، نو باید ثابته کړي چې د دوی قومندانان په یوه خوله دي او ټول تر یوه کنټرول لاندې دي. هغه زیاته کړې چې طالبان د دې خبرې د ثابتولو لپاره باید یوه میاشت اوربند اعلان کړي، څو معلومه شي چې طالب قومندانان تر یوې قوماندې لاندې دي. خو د دې تر څنګ یې پر دې هم ټینګار کړی چې ځینې طالبان د جګړې پلویان دي او دغه کسان لا سر له اوسه د داعش په لیکو کې فعالیت کوي.
محب د طالبانو مشرتابه د نشه يي توکو او انسانانو په قاچاق هم تورن کړ او وایي، د افغانستان روانې جګړې ته باید مذهبي رنګ ور نه کړل شي. د ولسمشر د ملي امنیت سلاکار وایي چې ځینې طالبان واک ته د رسېدو لپاره جګړه کوي، بله ډله د پردیو په لارښوونه او ملاتړ جګړه کوي او یوه بله ډله بیا د نشه يي توکو او انسانانو په قاچاق کې لاس لري. ده ټینګار کړی چې افغان حکومت سولې ته ژمن دی او د دایمي سولې یوازینۍ لار دا ده چې طالبان د پاکستان له ملاتړه لاس واخلي او دغه ډله مخامخ له افغان حکومت سره خبرې پيل کړي.
افغان حکومت داسې مهال د سولې طرحه وړاندې کړې چې په نړیواله کچه د افغان سولې لپاره اجماع رامنځ ته شوې، خو طالبان ټینګار کوي چې یوازې او یوازې له امریکا سره خبرې کوي. دوی افغان حکومت لاسپوڅی او بېواکه بولي.
