لانګ وار ژورنال: هیڅ تضمین نشته چې طالبان له القاعده سره اړیکې پرې کړي

لانګ وار ژورنال ورځپاڼې د امریکا او طالبانو ترمنځ شوې هوکړې ته په اشارې یوه راپور کې لیکلي، هیڅ تضمین وجود نلري چې طالبان دې له القاعده ډلې سره اړیکې پرې کړي. راپور کې د طالبانو او امریکا ترمنځ د شوې هوکړې او افغانستان کې د جګړې ډګر د ګرمېدو ارزونه شوې ده. سرچینه کاږي، که څه هم امریکا له طالبانو سره شوې هوکړه کې د دې ډلې له لوري له ترهګړو ډلو سره د مبارزې تضمین تایید کړی دی خو ظاهراً د دواړو ډلو د اړیکو پرېکېدو کومه نښه نښانه نه لیدل کېږي. راپور کې د ملګرو ملتونو له لوري خپاره شوي راپور ته اشاره شوې ده او زیاته شوې، په داسې حال کې چې د ترکمنستان د اسلامي تحریک په ګډون د القاعده ځینې نورې ډلې د طالبانو په لیکو کې د اسلامي امارت بیا ژوندي کولو لپاره جنګېږي، نو څه ډول باور کېدلی شي چې یادې دواړې ډلې چې مشترک اهداف لري یو له بل سره دې دوه اړخیزې ژورې اړیکي پرې کړي. سرچینه کاږي، طالبانو امریکا سره ژمنه کړې وه چې تاوتریخوالی به کموي خو د یوې اوونۍ له تېرېدو وروسته د امریکایانو په حضور کې یادې ډلې خپل عملیات نه یوازې پیل بلکې لا ډېر کړل نو په همدې اساس هیڅ تضمین نشته دی چې د بهرنیو ځواکونو تر وتلو وروسته دې دا ډله د شوې هوکړې پر نورو ژمنو عمل وکړي.