نړیوال بانک: افغانستان کې زرګونه ښوونځي ودانۍ نه لري

نړیوال بانک ویلي، چې افغانستان کې د پوهنې په سکتور کې پر ډېرې پانګونې سربېره لا هم زرګونه ښوونځي مناسبې ودانۍ نه لري او د اټکل له مخې ۷،۳ میلیونه هغه ماشومان چې بايد ښوونځيو ته ولاړ شي له زده کړو بې برخې دي. راپور کې راغلي یوازې د کابل په اطرافو کې د لومړي ټولګي څخه تر شپږم ټولګي پورې ګڼ زده کوونکي مناسب ټولګي او د څښاک پاکې اوبه نه لري. د پوهنې وزارت ویانده نوریه نضهت، وايي چې د ۷،۳ میلیونه ماشومانو له ډلې څخه چې ښوونځیو ته نه ځي، ۶۰ سلنه یې نجوني دي. د هغې په خبره جګړه او بې وزلي ښوونځیو ته د دغو ماشومانو د نه تګ لاملونه دي. نړیوال بانک ویلي چې افغان حکومت باید د پوهنې په برخه کې د بودجې په لګښت کې شفافیت راولي او ښوونکي د وړتیا له مخې پر دندو وګوماري.