پاکستان کې روانو لاریونونو افغان کډوال له ستونزو سره مخ کړي

په پاکستان کې یو شمېر افغان کډوال وایي، چې په دغه هېواد کې وروستیو لاریونونو او بې ثباتۍ له ګڼو ستونزو سره مخ کړي دي. دوی وایي چې په دغه هېواد کې پر افغان کډوالو محدودیتونه هم زیات شوي او د نیولو او بد چلند له وېرې نه‌شي کولای، چې له خپلو کورونو بهر ووځي. د سرپرست حکومت د کډوالو او بېرته راستنېدونکو چارو وزارت تازه په دې اړه څه نه‌ دي ویلي؛ خو تېره ورځ د یاد وزارت سرپرست په بهرنیو په ځانګړې توګه ګاونډیو هېوادونو کې له افغان کډوالو سره پر بد چلند نیوکه وکړه او له یادو هېوادونو څخه یې وغوښتل، چې له افغان کډوالو سره له بد چلنده ډډه وکړي.