له ایرانه افغانستان ته د چرګوړو واردات پيل شول

د دوغارون له لارې افغانستان ته د ایران د چرګوړو صادرات پیل شول. د ایران د تایباد ولسوال حسن جمشیدي ویلي، یوازې په تېرو درې ورځو کې تر ۲۵۰زرو ډېر چرګوړي افغانستان ته صادر شوي دي. نوموړي ویلي، چې د چرګوړو دغه ۱۱ صادراتي جوپې رسمي روغتیايي تصدیق لري او که د هر ډول سرغړونې نښې ولیدل شي؛ نو د جوپې د وتلو اجازه به ورنه کړل شي. جمشیدي زیاته کړې، چې د دوغارون له لارې د څارویو او د هغوی د محصولاتو صادرات د ایران لپاره د پام وړ عاید ترلاسه کړي او د افغان سوداګرو له پراخ هرکلي سره هم مخ شوي دي.  د هغه په وینا؛ د تېرو کلونو د سوداګریزو بهیرونو له مخې د دوغارون پوله افغانستان ته د ایران د چرګانو د صادراتو له مهمو لارو څخه یوه ده.