د ۲۰۲۶م کال د شانګهای همکارۍ سازمان د رسنیو او فکري مرکزونو غونډه د جولای په ۲۷مې نېټې د قرغېزستان په پلازمېنې بېشکېک کې پرانیستل شوه، چې پکې د دې سازمان د غړو هېوادونو د نږدې ۱۵۰ لویو رسنیو، مشهورو فکري مرکزونو، حکومتي ادارو او د شانګهای همکارۍ سازمان د سکرتریت شاوخوا ۲۶۰ استازو ګډون کړی دی.
د قرغېزستان د ولسمشرۍ دفتر د معلوماتو او تګلارې مسئول اولنبیکوف د يادې غونډې پرانیستونکو مراسمو ته په وینا کې ویلي، چې په اوسنۍ نړۍ کې رسنۍ او فکري مرکزونه د عامه نظر د لارښوونې او د هېوادونو ترمنځ د اعتماد او امنیت د خوندي ساتلو په برخه کې لوی مسؤلیت لري او د رسنیو او فکري مرکزونو همغږي د جعلي خبرونو مخه نیولی شي.
نوموړي باور ښودلی، چې ياده غونډه به د نویو افکارو او اقداماتو د رامنځته کېدو یو پلاټفورم وګرځي او د شانګهای همکارۍ سازمان د معلوماتو د امنیت د پیاوړتیا، د اکاډمیکې همکارۍ د ژورتيا او د دوستۍ د پلونو د جوړونې لپاره به خدمتونه وکړي.
فکري مرکزونو د غونډې په ترڅ کې « د ګوند جوړونې په اړه د شي جين پينګ د مفکورې عصري ځانګړتیاوې او نړیوال اهمیت» او «د انصاف او عدالت پیاوړتیا او د نړیوالې حکومتولۍ بشپړتیا – د شانګهای همکارۍ سازمان د همکارۍ لاسته راوړنې، فرصتونه او لرلید» په سرلیک راپورونه هم خپاره کړي دي.
