د ولسمشریزو ټاکنو نوماندان وایي، حکومت سر له اوسه د ولسمشریزو ټاکنو مهندسي کول پیل کړي او که دغه پروسه همداسې دوام وکړي، دوی به ټاکنې تحریم کړي.
نوماندان وایي، د ولسمشر غني د کاري مودې له پای ته رسېدو سره سره، نوموړی د قانون خلاف په لوړه کچه کمپایني ګومارنې کوي او هڅه کوي چې د راتلونکو ټاکنو پایلې په خپله ګټه را وڅرخوي.
دوی دغه راز وایي، د مدني حرکتونو لپاره روانه اونۍ چمتووالی نیسي او که غوښتنې یې ونه منل شي، راتلونکې ولسمشریزې ټاکنې به تحریم کړي.
ولسمشریزو ټاکنو ته ولاړ نوماندان ادعا کوي چې حکومت په ناقانونه توګه د یوه مشخص ټیم په ګټه له دولتي امکاناتو استفاده کوي.
د ولسمشریزو ټاکنو د نوماندانو له ډلې فرامرز تمنا وایي: «اوسنی روان وضعیت د افغانستان په ګټه نه دی. د یو ځانګړي ټیم په ګټه له دولتي امکاناتو ګټه اخیستنه، د ملت په ګټه نه ده، په حکومت کې په لوړه کچه روانې ګومارنې هغه هم په داسې حال کې چې ټاکنو ته لږ وخت پاتې دی، د ټاکنو د مهندسي کېدو په مانا دي».
یاد نوماندان په داسې مهال کې نیوکه کوي چې د غبرګولي له لومړۍ وروسته، د ولسمشر غني د کار دوام غیر قانوني دی او باید صلاحیتونه یې محدود شي.
دوی دغه راز وایي، په دې وروستیو کې د حکومت د خپلسریو او ناقانوني کړنو له کبله روانه اونۍ د مدني حرکتونو لپاره هم چمتووالی نیسي او ډېر ژر به په ټول هېواد کې پراخ مدني حرکتونه پیل کړي.
ولسمشریزو ټاکنو ته نوماندان وايي، هیله لري چې غوښتنې یې ومنل شي، خو ګواښ کوي که يې غوښتنې ونه منل شي او له دولتي امکاناتو څخه د یوه خاص ټیم په ګټه همداسې استفاده وشي، له هرې ممکنه لارې به کار واخلي او ټاکنې به تحریم کړي.
تمنا زیاتوي: «هیله من یو چې د ملي یووالي حکومت اوسني مشران به روانې ډیکتاتورۍ ته د پای ټکی کېږدي او اجازه ورنه کړي چې د یوه ځانګړي ټیم په ګټه له دولتي امکاناتو ګټه واخلي. که حکومت خپل صلاحیتونه محدود نه کړي او روانې ګومارنې پای ته ونه رسوي، د ولسمشریزو ټاکنو نوماندان به په ټولیز ډول ټاکنې تحریم کړي».
ولسمشریزو ټاکنو ته دغه نوماندان داسې مهال حکومت د راتلونکو ولسمشریزو ټاکنو پر مهندسي کولو تورنوي، چې د ولسمشریزو ټاکنو د تر سره کېدو لپاره شاوخوا څلور میاشتې پاتې دي.
