وسله والو طالبانو یو ځل بیا پر کندوز ښار بریدونه وکړل. طالبانو وړمه شپه ناوخته له څلورو خواوو پر کندوز ښار بریدونه پيل کړل او له امنیتي ځواکونو سره یې کلکه نښته وکړه. راپورونه وایي چې په پېښه کې دواړو لورو ته درنه مرګ ژوبله اوښتې ده، خو وروستۍ شمېرې لا د جګړې د دوام له امله نه دي خپرې شوې. ملکي وګړي په کندوز کې تر سخت فشار لاندې دي، خو حکومت د دوی د امنیت د تامین ژمنه کړې ده.
سره له دې چې پر کندوز برید نوې خبره نه ده، خو حکومت له تېرو تجربو ګټه وا نه خیسته او د کندوز ښاریان یو ځل بیا د خونړۍ جګړې شاهدان دي. کندوز چې په شمال کې ځانګړی ارزښت لري او مهم سوداګریز بندر په دغه ولایت کې دی، په دې وروستیو کلونو کې د طالبانو د سختو جګړو شاهد دی. طالبانو یو ځل په ۲۰۱۵ ز کال کې پر دغه ښار برید وکړ او څو ورځې یې کندوز په ولکه کې و. بیا د ناټو ځواکونو په ملتیا افغان پوځيان بریالي شول چې طالبان په شا وتمبوي او کندوز ونیسي. په ۲۰۱۶ ز کال کې بیا هم پر دغه ولایت برید وشو او د امنیتي ځواکونو له لوري تر بیا نیولو وروسته، د دغه ښار د وضعیت ارزولو لپاره یو حقیقت موندونکی پلاوی وګومارل شو. پلاوي په خپل راپور کې وویل چې د رهبرۍ کمزوري او د دغه ښار امنیتي پېچلتیا د سقوط لاملونه دي. خو سره له تجربو طالبانو یو ځل بیا وړمه شپه پر دغه ښار برید وکړ او پرون یې ټوله ورځ جګړه وکړه.
د ملي دفاع او کورنیو چارو سرپرست وزیران دغه ولایت ته لاړل او وايي، موخه یې دا ده چې په کندوز کې روانه جګړه له نږدې مدیریت کړي. له دوی سره په دې سفر کې په افغانستان کې د ناټو ځواکونو عمومي قومندان جنرال سکاټ مېلر هم شامل دی. د ملي دفاع سرپرست وزیر اسدالله خالد له رسنیو سره په خبرو کې وویل چې طالبان تر فشار لاندې دي، نو ځکه غواړي د رسنیو توجه ځان ته واړوي. خالد وايي:((په نورو ولایتونو کې طالبان تر فشار لاندې دي. تلفات یې لوړ شوي دي. ځکه پر کندوز برید کوي، غواړي رسنۍ ځان ته متوجه کړي. موږ په کندوز کې یو او د دوی تر ختمولو پورې به عملیات کوو)).
بل پلو راپورونه وایي چې دواړو لورو ته په جګړه کې درنه مرګ ژوبله اوښتې ده. د تېرې شپې تر اتو بجو پورې په کندوز کې د عامې روغتیا ریاست سرچینو رسنیو ته وویل، چې تر دې دمه د اتو ملکیانو جسدونه او ۶۰ ټپیان وروړل شوي دي. پرون ماښام ناوخته بیا وسله والو طالبانو د کندوز ښار په مرکزي چوک کې ځانمرګی برید وکړ، چې ۲۳ کسانو ته پکې مرګ ژوبله اوښتې ده. د دغه ولایت د امنیه قومندان ویاند سید سرور حسیني او مرستیال ویاند نصیر په ګډون، ۱۱ کسان پکې وژل شوي او ۱۲ نور ټپیان دي. په ټپیانو کې امنیه قومندان منظور ستانکزی هم شامل دی .
ولسمشر غني بیا پر کندوز د طالبانو برید غندلی دی او په خبره یې، د دوی دغه ډول بریدونه یې په قطر کې د مشرانو له روانو خبرو سره په ټکر کې بللي دي. د ولسمشر غني په خبره، د طالبانو برید وښوده چې دوی سولې ته ژمن نه دي او تر دې دمه پر جګړه باور لري. هغه زیاته کړې چې افغان امنیتي ځواکونه به د خلکو له مال او ځانه دفاع کوي او په کندوز کې به د طالبانو تر ختمولو پورې جګړه کوي. ولسمشر غني ټینګار وکړ چې دوی سولې ته ژمن دي، خو هغه سولې ته چې د افغانانو عزت او لاس ته راوړنې خوندي کړي. ولسمشر غني یو ځل بیا ټینګار کړی چې امنیتي ځواکونه د معاملې وړ نه دي او له هېچا سره به د سولې په هېڅ تړون کې پر امنیتي ځواکونو معامله ونه کړي.
په کندوز کې داسې مهال خونړۍ جګړه روانه ده، چې طالب او امریکایي استازي لا هم په قطر کې د سولې پر مسایلو خبرې کوي. دواړه لوري د پرمختګونو خبره کوي، خو افغانان لا هم د سولې روانو خبرو او خونړۍ جګړې اندېښمن کړي دي.
