کورنیو چارو وزارت:  په کندوز ښار کې تصفیوي عملیات روان دي

کورنیو چارو وزارت نن سهار رسنیو ته په استولي پیغام کې ویلي چې په کندوز کې له تېرې شپې راهیسې چاڼیز عملیات روان دي او وسله والو طالبانو ته درنه مرګ ژوبله اوښتې ده. د سرچینې په خبره ددغه ډلې ځینې وسله وال نږدې سیمو ته په تېښته دي خو د افغان ځواکونو له کمین سره مخ کېږي. کورنیو چارو وزارت د افغان ځواکونو د تلفاتو په اړه څه نه دي ویلي. وسله والو طالبانو وړمه شپه پر کندوز ښار برید وکړ او تر پرون غرمې پورې جګړه روانه وه. له کابل د کوماندو او نورو ځواکونو په ورسېدو طالبان په شا شول خو ماښام مهال یې د کندوز پر امنیه قومندان ځانمرګی برید وکړ. په پېښه کې امنیه قومندان ټپي شوی، خو نږدې لس کسه نور چې ملکیان هم پکې دي وژل شوي دي. کورنیو چارو وزارت وايي نن به کندوز بېرته عادي وضعیت خپل کړي او خلک به خپلو کارونو ته ور ورګرځي.