د دوحې مذاکرات؛ لا هم د طالبانو او امریکا ترمنځ په مذاکراتو کې ژور اختلافات شته دي

سره له دې چې د مذاکراتو په نهم پړاو کې د امریکايي او طالب لوري ترمنځ د هوکړې د لاسلیک خبره کېده، خو د دواړو لورو ترمنځ مذاکرات بې پایلې پای ته رسېدلي دي. له قطر دفتره ځینو سرچینو کابل نیوز ته ویلي، چې د طالبانو او امریکا ترمنځ د هوکړې پر پنځمه ماده اختلاف رامنځ ته شوی دی، نو ځکه دوی د هوکړې لاسلیک ته تر دې دمه تیار نه دي.
تر دې وړاندې په اتم پړاو مذاکراتو کې داسې انګېرل کېده، چې امریکا او طالبان به د افغان جګړې د پای ته رسولو لپاره هوکړه لاسلیک کړي، خو دا مسئله نهم پړاو مذاکراتو ته لاړه. نهم پړاو مذاکرات د دواړو لورو ترمنځ اوږده شول او د پرمختګونو خبره کېده. خو له پرمختګونو سره سره، تر دې دمه دواړه لوري نه دي بریالي شوي چې هوکړه لاسلیک کړي. ویل کېږي چې تازه د طالبانو او امریکا ترمنځ د هوکړې پر پنځمه ماده اختلاف رامنځ ته شوی دی. سرچینې وايي، طالبانو پر بهرنیو ځواکونو د برید نه کولو مسئله له افغان ځواکونو د امریکايي ځواکونو په نه ملاتړ پورې مشروطه کړې ده. طالبان ټینګار کوي چې امریکايي لوری دې له افغان ځواکونو خپل ملاتړ واخلي او په دې توګه به دوی هم پر بهرنیو ځواکونو خپل بریدونه ودروي.
بلخوا سرچینې وایي، امریکا دا خبره منلې ده چې په پټه به له رسمیاتو او سند پرته پر افغان ځواکونو خپلې مرستې کمې کړي، خو د هوکړې په متن کې دا مسئله ذکر کول د امریکا حیثیت ته زیان رسوي. طالبان بیا ټینګار کوي چې باید ټول مسایل په لیکلې بڼه په هوکړه کې ځای پر ځای شي.
طالبان دغه راز وايي چې د امریکا او طالب لوري ترمنځ د هوکړې له لاسلیک سره سم باید له افغان حکومت سره د امریکا تړونونه لغوه اعلان شي، خو امریکا دې کار ته نه ده تیاره او وايي چې دا مسئله به په افغانستان کې د نوي حکومت تر راتګ پورې د بحث وړ نه وي. طالبانو له امریکا سره دا خبره نه ده منلې چې د خپلو ټولو ځواکونو تر وتلو وروسته به دغه تړون لغوه کوي، بلکې پر دې ټینګار کوي چې تړون باید له دوی سره د نوي تړون له لاسلیک سره سم لغوه کړل شي.
د سیاسي مسایلو شنونکی وحید مژده بیا وایي، چې اوس د افغانستان د ستونزې د حل لپاره یوازې دا لار پاتې ده چې د طالبانو په شمول، یو ګډ حکومت جوړ کړل شي او تر هغې وروسته به ټول مسایل د دې حکومت له لوري حل کړل شي. مژده وايي: ((دا مسئله هغه وخت حل کېږي چې د طالبانو په ګدون یو نوی حکومت جوړ کړل شي. طالبان باید پکې رول ولري. دغه حکومت باید بیا ټول مسایل له امریکا سره حل کړي)).
بلخوا طالبان او امریکا بیا دواړه په خبرو کې د پرمختګونو خبره کوي. زلمي خلیلزاد ویلي وو، دوی د داسې هوکړې په لټه کې دي چې په افغانستان کې تاوتریخوالی راکم کړي او په دغه هېواد کې د جګړو د ختمېدو سبب شي. ده پر طالبانو هم غږ کړی و چې د کندوز په څېر جګړې دې پای ته ورسوي او له تاوتریخوالي دې لاس واخلي.
خلیلزاد په خبرو کې د پرمختګ خبره هم کړې ده او وايي، ډېر ژر به د سولې د روانو خبرو په اړه ټول معلومات له افغان حکومت سره شریک کړي. طالب ویاند سهیل شاهین هم په یوه ټوېټ کې ویلي، چې خبرې په ښه لوري روانې دي. د ده په خبره، دوی پر مهمو مسایلو هوکړې ته رسېدلي دي او یوازې ځينې تخنیکي مسایل د بحث لپاره پاتې دي.