په کابل کې د وړمې شپې برید درنه مرګ ژوبله واړوله، خو تر څنګ یې د سیمې خلکو ته هم میلیونونه افغانۍ مالي زیانونه اوښتي دي. د کابل د نهمې امنیتي حوزې اړوند د قابل بای سیمې اوسېدونکي چې د برید هدف (ګرین وېلج) ته نږدې وو، بل ځای ته د دغه کمپ لېږدول کېدو غوښتونکي دي.
وړمه شپه په کابل کې د نهمې حوزې په مربوطاتو کې د ګرین وېلج په نامه د بهرنیانو پر یوه کمپ ځانمرګی برید وشو. برید خورا دروند او غږ یې د کابل تر لرو پرتو سیمو واورېدل شو. تر برید وروسته په سیمه کې د امنیتي ځواکونو او پنځو وسله والو ځانمرګو ترمنځ نښته پیل شوه، چې د وسله والو په وژل کېدو پای ته ورسېده. د کورنیو چارو وزارت وایي چې په پېښه کې ۱۶ کسه وژل شوي او ۱۱۹ نور ټپیان دي. یوازې دا نه، د دې ترڅنګ د دې سیمې خلکو ته درانه مالي زیانونه هم اوښتي دي.
تېره ورځ د ګرین وېلج کمپ سیمې ته نږدې د قابل بای د سیمې اوسېدونکو د دغه پېښې په غبرګون کې لاریون کړی و او د دې غوښتونکي وو چې دغه کمپ باید له دې سیمې و ایستل شي. د قابل بای سیمې اوسېدونکو د یوه لاریون په ترڅ کې د ملکي خلکو له کورونو د دغه ډول کورنیو او بهرنیو تاسیساتو، چې د وسله والو په نظامي اهدافو کې شامل دي، د انتقالولو غوښتنه وکړه، خو لاریون د پولیسو او لاریونوالو ترمنځ پر تاوتریخوالي واوښت. د سیمې خلک وایي، دا څووم ځل دی چې دغه کمپ تر برید لاندې راځي، خو له ملکي سیمو یې د انتقال لپاره هېڅ اقدام نه کیږي.
د سیمې یوه اوسېدونکي رحیم الله مسیر ورځپاڼې ته وویل، که حکومت وغواړي بهرنیان په هر ځای کې امن ساتلی شي، نو ځکه پکار ده چې دوی له دغې ملکي سیمې وباسي. د ده په خبره، په سیمه کې د بهرنیانو د کمپ د موجودیت له امله هر ځل په وسله والو بریدونو کې ملکي وګړو ته مرګ ژوبله اوړي. نوموړی وايي: ((موږ هر ځل په برید کې زیانمنېږو. حکومت دا بهرنیان هر ځای ساتلی شي، بل ځای ته یې دې بوځي، که حکومت مو خبره و نه مني، لاریون ته ادامه ورکوو)).
لاریون کوونکو پر پرونۍ پېښه خورا توند غبرګون وښود او ډېر یې د بهرنیانو دغه کمپ ته دننه شول. ویل کېږي چې دوی په سیمه کې ځینو څېزونو ته اور ورته کړی دی او وروسته پولیسو د لاریون کوونکو د لرې کولو لپاره هوايي ډزې هم کړې دي. د پولیسو او لاریون کوونکو ترمنځ اخ ډب کې ځینو ملکیانو ته مرګ ژوبله هم اوښتې ده.
بلخوا په روغتونونو کې د پېښې ټپیان او عیني شاهدان وايي چې دغه چاودنه خورا زوروره وه او پر حکومت نیوکه کوي چې د خلکو د امنیت په تامین او دغه راز د ورته خونړیو چاودنو په مخنیوي کې پاتې راغلی دی. د کورنیو چارو وزارت وایي، دوی د پېښې پلټنه پيل کړې ده او ډېر ژر به ښکېل خلک د قانون منګولو ته وسپارل شي. د دغه وزارت ویاند نصرت رحیمي وايي، برید وسله والو طالبانو تر سره کړی دی، خو زیانمن شوي ټول ملکیان دي، یوازې په وژل شوو کې دری امنیتي کسان شامل دي.
د دغې چاودنې د شدت له امله د پېښې سیمې ته نږدې د عامو خلکو ډېر کورونه، دوکانونه او نور تاسیسات په بشپړه توګه تخریب شوي دي. په دغه برید کې د تیلو یوه سټېشن اور اخیستی او د شاوخوا ۴۰ موټرو د ویجاړېدو ترڅنګ یې خلکو ته درانه مالي زیانونه اړولي دي.
د پوځي چارو شنونکي وایي چې په ملکي سیمو کې د کورنیو او بهرنیانو دا ډول کمپونه، چې احتمالاً د وسله والو تر نظامي اهدافو لاندې راځي، باید نورو سیمو ته انتقال شي. د پوځي چارو شنونکی ظاهر عظیمي وایي، دا پېښې ښايي بیا تکرار شي او ملکي وګړي زیانمن کړي، نو ښه به وي چې حکومت دغه ډول بهرني کمپونه د عامو وګړو د استوګنې له سیمې وباسي.
په کابل کې داسې مهال خونړۍ چاودنه کېږي چې د افغان سولې لپاره د امریکا ځانګړی استازی په کابل کې دی او وایي، له طالبانو سره هوکړې ته رسېدلي او د ټرمپ تر تایید وروسته به یې عملي کېدل پیل شي. د هغه په خبره، د دې هوکړې د عملي کېدو له پیل سره سم به د تاوتریخوالي کچه هم راټيته شي.
