رومانیا: د کابل په وروستۍ پېښه کې زموږ یو ديپلومات وژل شوی دی

په ګرین ولیج د وسله والو طالبانو په برید کې کې د رومانیا یو لوړپوړی ديپلومات هم وژل شوی دی. ددغه هېواد د بهرنیو چارو وزارت په یوه خبرپاڼه کې راغلي چې د دوی یو لوړپوړی ديپلومات په کابل کې په ګرین ولیج په یوه ترهګریز برید کې وژل شوی دی. خبرپاڼه کې راځي چې د پېښې په ځای کې ددوی نور دپيلوماتان هم وو، خو له سیمې په مصؤنه توګه لېږدول شوي وو. له دې سره جوخت داسې راپورونه هم شته چې ښايي په دغه برید کې ځینې نور بهرني وګړي په تېره ددغه کمپ ساتونکي وژل شوي وي. خو حکومتي سرچینو رسما دغه راپورونه نه دي تایید کړي. وسله والو طالبانو وړمه شپه پر ګرین ولیج کمپ خونړی برید وکړ، چې له امله یې څه کم ۱۵۰ کسانو ته مرګ ژوبله واوښته او خلکو ته میلیونونه افغانۍ مالي زیانونه هم ددغه پېښې له امله اوښتي دي.