جنرال جک کېن: امریکا دې د ټولو سرتېرو د ایستلو تېروتنه نه کوي

ښایي د امریکايي ځواکونو له وتلو وروسته افغانستان د ترهګرو لپاره امن پټنځای شي. پخواني امریکايي پوځي چارواکي جنرال جک کېن ویلي، امریکا ته نه ده په کار چې د ټولو سرتېرو د ایستلو تېروتنه وکړي. دده په وینا د امریکايي ځواکونو له وتلو سره سم به د پاکستان په سرحدي سیمو کې د القاعده شته غړي بیا راپورته شي او په افغانستان کې به جګړه وکړي. هغه زیاته کړې چې وسله وال طالبان هم پر سیاسي حل باور نه لري او دوی د جګړې نسل دی چې ښایي خپلې جګړې ته ادامه ورکړي. جنرال جک زیاته کړې چې امریکا دې پر طالبانو باور نه کوي او په افغانستان کې دې د خپلو ځواکونو حضور ته ادامه ورکړي. نوموړي د سولې هوکړې په اړه هم اندېښنه ښودلې او په خبره یې تر دې دمه هم ددغه هوکړې جزیات له خلکو سره نه دي شریک شوي چې دا د جدي اندېښنې وړ مسئله ده.