له طالبانو سره د امریکا د مذاکراتو تر لغوه کېدو وروسته، ټرمپ تازه څرګندونې کړې دي. د امریکا ولسمشر ډونالډ ټرمپ وايي، له وسله والو طالبانو سره د سولې مذاکراتو لپاره نورې لارې هم موجودې دي. ټرمپ د تېرو څرګندونو په پرتله تازه په یوه نسبتاً نرم ټوېټ کې ویلي، چې طالبانو خپله تېروتنه درک کړې، پر خپل کار پښېمانه شوي او له دوی سره د خبرو لپاره نورې لارې هم شته دي. د چارو شنونکي او پخواني طالب چارواکي بیا وایي، د ټرمپ له وروستي دریځه داسې ښکاري، چې واشنګټن له طالبانو سره د سولې خبرو بېرته پیلول غواړي.
ټرمپ په دې وروستیو کې له طالبانو سره د مذاکراتو په اړه ډول ډول څرګندونې کوي. له دې سره هممهاله طالبان هم په مسکو کې دي او هلته یې له روسي چارواکو سره د افغان سولې پر مسئله خبرې کړې دي. بلخوا افغان حکومت هم د سولې د هڅو په اړه متفاوت دریځونه خپلوي. د ولسمشر غني ویاند په تازه څرګندونو کې ویلي چې د سولې د هر ډول هڅو درولو امر یې کړی او د حکومت ټول تمرکز پر ټاکنو دی.
خو سره له دې داسې ښکاري چې ټرمپ غواړي له طالبانو سره خبرې بېرته پيل کړي. د امریکا ولسمشر ډونالډ ټرمپ تېره ورځ په تازه ټوېټونو کې ویلي وو، طالبان تر بل هر وخت سخت ځپل شوي دي. د ده په خبره، د طالبانو ځپل به دوام ولري، خو دغه ډله اوس پښېمانه شوې ده او له دوی سره د سولې لپاره نورې لارې هم شته دي. ټرمپ زیاته کړې: ((طالبان تر اوسه دومره سخت نه وو ځپل شوي، لکه اوس چې ځپل کیږي. د یوه ستر امریکايي سرتیري په ګډون د ۱۲ کسانو وژل ښه فکر نه و. د مذاکراتو پرمخ بیولو لپاره نورې ښې لارې شته. طالبان پوهیږي چې ډېره ستره تېروتنه ترې شوې ده، خو اوس نه پوهیږي چې څنګه یې جبران کړي)).
ټرمپ په خپل ټوېټ کې ټینګار کړی چې طالبان پر خپله تېروتنه پوهېدلي دي، خو اوس یې د جبرانولو په لارو چارو پسې ګرځي. ده له طالبانو سره د سولې د خبرو د نوو لارو یادونه هم کړې ده، خو دغه لارې یې نه دي مشخصې کړې او نه یې هم ویلي چې څنګه غواړي له طالبانو سره مذاکرات وکړي.
که څه هم د ډونالډ ټرمپ په وروستي ټویټ کې له طالبانو سره په څرګنده د سولې د خبرو یادونه نه ده شوې، خو د چارو شنونکي وایي، د ده له وروستي دریځه داسې ښکاري چې له طالبانو سره د خبرو لپاره پر نویو لارو چارو غور کوي. پخوانی طالب چارواکی جلال الدین شینواری وایي، د جګړې ټول ښکېل لوري پر دې پوهېږي چې افغان جګړه له نظامي لارو د حل وړ نه ده او باید پر سیاسي لارو چارو یې غور وشي. نوموړي زیاته کړې: ((امریکایان پرته له دې چې مذاکرات وکړي او افغان جګړې ته د مذاکراتو له لارې د پای ټکی کېږدي، بله هېڅ لاره نه لري. ښايي ټرمپ دا پرېکړه چې له طالبانو سره مذاکرات لغوه کړي، د احساساتو په حالت کې نیولې وي او بېرته له خپلو څرګندونو پښېمانه شي. په دې توګه به بېرته د طالبانو او امریکا تر منځ اغېزناکې خبرې پيل شي)).
د ولسي جرګې غړي هم پر دې باور دي چې باید د سولې دروازې ونه تړل شي او تر ولسمشریزو ټاکنو وروسته دې ژر تر ژره د سولې مذاکرات بېرته پيل شي. د ولسي جرګې غړی شیر محمد اخندزاده وايي: ((هیله مو دا ده چې د سولې د مذاکراتو دروازه و نه تړل شي. تر ټاکنو وروسته دې بېرته په دې اړه هڅې پيل شي. د افغان جګړې د حل یوازینۍ لار د سولې خبرې دي)).
له وسله والو طالبانو سره د مذاکراتو په تړاو د ټرمپ څرګندونې داسې مهال دي، چې د طالبانو د قطر دفتر یو پلاوی اوس هم د مسکو په سفر بوخت دی او ویل کیږي پر روسیې سربیره به چین او د سیمې ځینو نورو هېوادونو ته هم سفرونه وکړي.
