د بشري حقونو د څار نړیوال سازمان: د (CIA) له ملاتړ برخمن ځواکونه افغانستان کې جنایتونه ترسره کوي

د بشري حقونو د څار نړیوال سازمان په خپل نوي راپور کې ویلي، هغو افغان ځواکونو چې د سي‌ای‌اې ملاتړ ورسره دی، له بشري حقونو جدي سرغړونې کړې او په عملیاتو کې یې ملکي وګړي په نښه کړي دي. شپني عملیات، هوایي بریدونه، نیونې، د ځینو کسانو تري تم کول او پر روغتیایي مرکزونو بریدونه هغه تکتکیونه یاد شوي چې دغه ځواک ورنه کار اخلي او د ملکي مرګ ژوبلې لامل ګرځېدلي دي. دغه سازمان له افغان حکومته غواړي چې ژر تر ژره ټولې دولت پلوه وسله والې ډلې چې پکې د سي ‌ای‌ اې له ملاتړه برخمن ځواک هم شامل دی منحل کړي. دغه سازمان ۱۴ داسې پېښې مستندې کړې چې د مسوولانو په وینا د سي‌ ای ‌اې له ملاتړه برخمن ځواک بدې کړنې او له بشري حقونو جدي سرغړونې ښيي. په راپور کې د ۰۴، ۰۱،۰۲،۰۳ په نامه قطعې، د کندهار یرغلیز ځواک، د خوست ساتونکی ځواک یا کمپاین یادونه شوې چې ظاهرا د افغانستان د ملي امنیت ریاست په چوکاټ کې فعالیت کوي، خو راپور کاږي چې د دغو ځواکونو د ګومارنې، روزنې، سمبالښت او مدیریت واک له سي ‌ای ‌اې سره دی. د ولسمشر ویاند صدیق صدیقي بیا ددې راپور په غبرګون کې ویلي، ددغه ډلو پر کړنو څار ستونزمن کار دی، خو داسې طرحه جوړېږي چې له مخې یې ددوی په عملیت کې باید له پوره دقت کار واخیستل شي. هېره دې نه وي چې تر دې وړاندې هم د سي ای اې له ملاتړه د برخمنو ځواکونو په اړه دغه ډول راپورونه خپاره شوي دي.