د ټاکنو خپلواک کمېسیون کې د نورو ناندریو تر څنګ، تازه د رایو د بیاشمېرنې پر سر هم ناندرۍ را ولاړې شوې دي. د ټاکنو خپلواک کمېسیون یوه ډله کمېشنران وایي چې د رایو بیاشمېرنه به نن چهارشنبه په ۳۴ ولایتونو کې پیلېږي، خو یوه ډله بیا وایي چې نه د بې برخلیکه رایو په اړه تر وروستۍ پرېکړې پورې باید بیاشمېرنه پيل نه شي.
سره له دې چې د ټاکنو خپلواک کمېسیون تېره دوشنبه د رایو د بیاشمېرنې لپاره ټاکلې وه، خو د ستونزو له امله دغه لړۍ پیل نه شوه. د ټاکنو خپلواک کمېسیون تېره ورځ وویل، چې ولایتونو ته د ناظرینو او ټاکنیزو کارکوونکو د نه رسېدو له امله په دې پروسه کې ځنډ رامنځ ته شوی دی او ښایي نن چهارشنبه د رایو بیاشمېرنه پيل شي. د ټاکنو خپلواک کمېسیون کمېشنر مولانا عبدالله بیا وایي، تر هغه پورې چې د بې برخلیکه رایو په اړه پرېکړه نه وي شوې، د رایو بیاشمېرنه امکان نه لري. مولانا عبدالله وايي: ((ترڅو پورې چې د هغو ۱۳۷۶۳۰ بې برخلیکه رایو په تړاو وروستۍ پرېکړه نه وي شوې، د رایو بیاشمېرنه امکان نه لري. د دې رایو د برخلیک په اړه لا هم کمېسیون پرېکړه نه ده کړې او له دې پرته د رایو بیاشمېرنې بهیر به ستونزې لا ډېرې کړي)).
نوموړي نه یوازې دا چې د رایو بیاشمېرنه ناممکنه ګڼلې، بلکې په خپلو خبرو کې یې ویلي چې د کمېسیون ځینې هغه غړي چې په درغلیو کې لاس لري، باید لویې څارنوالۍ ته ور وپېژندل شي او سزا ورکړل شي.
بلخوا د ټاکنو خپلواک کمېسیون وايي، په ۳۴ ولایتونو کې به د ځینو محلونو د رایو بیاشمېرنه سر له نن چهارشنبې پیل شي. د دغه کمېسیون د معلوماتو له مخې، تمه وه چې پرون سه شنبه په ۳۴ ولایتونو کې د ځینو محلونو د رایو بیاشمېرنه پیل شوې وای، خو د کمېسیون یوې کمېشنرې رحیمې ظریفي وویل، د ځینو دلایلو په ځانګړي ډول ولایتونو ته د کمېسیون د پلاوي د نه رسېدو له امله، کېدای شي د رایو د بیاشمېرنې بهیر نن چهارشنبه پیل شي. نوموړې وايي: ((۹۵ سلنه امکان شته چې د رایو بیاشمېرل نن پیل شي. اړتیا وه چې ځینې پرېکړې د رایو د بیاشمېرنې په بهیر کې د دقت لپاره وشي چې په دې اړه موږ نږدې لس پرېکړې وکړې)).
د ټاکنیزو شکایتونو کمېسیون له دې وړاندې اعلان کړی و چې د نږدې ۱۸۴۴ محلونو رایې باید له سره وشمېرل شي. د ټاکنو خپلواک کمېسیون کمېشنره رحیمه ظریفي وايي، د ۱۸۰۰ محلونو د رایو د بیاشمېرنې بهیر به نږدې دری ورځې وخت ونیسي.
خو د ټاکنو ځینې څارونکي بنسټونه بیا له یوې ورځې بلې ته د رایو د بیاشمېرنې بهیر ځنډېدل، د سیاسي فشار پایله بولي. د افغانستان د رڼو ټاکنو د بنسټ یا ټیفا ویاند زبیر حبیب زاده وايي، که دا بهیر نور هم وځنډول شي، د ټاکنو بې پرېوالی به تر پوښتنې لاندې راشي. زبیر زیاتوي: ((دا بحث پر کمېسیون د سیاسي فشارونو پایله ده، کمېسیون باید خپله خپلواکي وساتي، د کمېسیون له خوا د هر ډول سیاسي فشار منل ټاکنې تر پوښتنې لاندې راولي)).
د ټاکنو خپلواک کمېسیون بیا د فشار موجودیت ردوي او وایي، دوی په پوره بې پرېوالي او خپلواکه توګه خپلې چارې پر مخ وړي او خپلو اصولو ته ژمن دي.
د افغانستان د رڼو ټاکنو بنسټ د سیاسي فشارونو د څرنګوالي په اړه څه نه وايي، خو له دې وړاندې د عبدالله عبدالله په مشرۍ د ثبات او همپالنې ټاکنیزې ډلې ویلي، د ټولو رایو د تصفیې تر پای پورې باید د رایو بیاشمېرنې بهیر وځنډول شي.
