سیګار: افغان حکومت؛ فساد سره د مبارزې برخه کې ډیری معیارونه پوره کړي

د افغانستان د بیا رغونې لپاره د امریکا د څار ادارې (سیګار) ویلي، افغان حکومت له فساد سره مبارزې برخه کې پرمختګ کړی دی خو لا هم ځینې جدي ننګونې پر خپل ځای پاتې دي. سیګار په خپل راپور کې لیکلي، که څه هم افغان حکومت له فساد سره د مبارزې په برخه کې ډیری معیارونه پوره کړي، خو دا تضمین نشته چې پیل شوي اصلاحات به له قوي سیاسي ارادې پرته دوام وکړي. سیګار زیاته کړې، افغان حکومت د روان کال تر جون میاشتې پورې له فساد سره د مبارزې په برخه کې له ۷۶ معیارونو څخه ۵۷ یې پوره کړي خو د پاتې معیارونو د پوره کولو په اړه اندېښنې لا هم پر ځای پاتې دي او د پام وړ پایلو د لاسته راوړلو لپاره دومداره اقداماتو ته اړتیا ده. راپور کې راغلي، د فساد ضد د مهمو ادارو د سرچینو کموالی، فساد کې د ښکېلو ځواکمنو کسانو معافیت او د اداري فساد پر ضد د مبارزې ځانګړې محکمې د فعالیتونو کمېدل هغه جدي ننګونې دي چې حکومت ورسره لاس او ګریوان دی.