سره له دې چې د ټاکنو کمېسیون له څو پر له پسې وخت تلفۍ وروسته، د رایو بیاشمېرنه او تفتیش پيل کړی، خو ټاکنیز ټیمونه د کمېسیون دغه کار غیر قانوني بولي. دوی وایي، د ټاکنو خپلواک کمېسیون باید په لومړي ګام کې د ټولو رایو سقف معلوم کړي او تر هغه وروسته دې په قانوني توګه د ځینو رایو تفتیش پیل کړي. خو د ټاکنو خپلواک کمېسیون تېره ورځ په څلور دېرشو ولایتونو کې تر اته زره د ډېرو محلونو د رایو بیاشمېرنه پیل کړې ده.
د ټاکنو خپلواک کمېسیون ان تېره اونۍ د دوشنبې په ورځ ویلي وو، چې د ځینو محلونو رایې به بیا شمېري، خو دغه پروسه ایله پرون پيل شوه. د ټاکنو خپلواک کمېسیون په اعلامیه کې راغلي چې د ټاکنیزو ډلو او نړیوالو ناظرینو په حضور کې په ۳۴ ولایتونو کې د رایو بیاشمېرنه پيل شوې ده او په دې کې به د ځینو محلونو رایې تفتیش شي. د ټاکنو خپلواک کمېسیون د دارالانشا رییس حبیب الرحمن ننګ وایي، چې په دې پروسه کې به د ۸۲۵۵ محلونو د رایو بیاشمېرنه کېږي. ننګ وايي: ((د کمېسیون د غړو د پرېکړې پر بنسټ، د ۸۲۵۵ ټاکنیزو محلونو رایې په ۳۴ ولایتونو کې بیا شمېرل کېږي)).
د ده په خبره، د رایو د بیاشمېرنې بهیر د لوایحو، کړنلارو او قوانینو په رڼا کې پیل شوی او موخه یې هم د شفافیت تامین او د خلکو رایو ته درناوی دی. نوموړي بیا هم ټینګار کړی چې لومړنۍ پایلې به په ټاکلې نېټه اعلانېږي او دوی په پوره چټکتیا کار کوي، څو له مهالوېش سره سم مخ ته لاړ شي. ننګ د ټاکنیزې پروسې له ټولو دخیلو اړخونو په تېره له نوماندانو غوښتي، چې په دې پروسه کې پوره همکاري وکړي.
د ټاکنو خپلواک کمېسیون اوس په ۳۴ ولایتونو کې د ځینو مرکزونو د رایو بیاشمېرنې پروسه پيل کړې ده. د کمېسیون په اعلامیه کې راغلي: ((د ټاکنو خپلواک کمېسیون د رایو د بیاشمېرنې او تفتیش لپاره د تخنیکي موادو بسته بندي، د څارونکو او کتونکو په حضور کې پیل کړې ده)).
بلخوا د ټاکنو کمېسیون دغه پرېکړه د ټاکنیزو ډلو له غبرګون سره مخ شوې ده او تر پرونه دریو ټاکنیزو ډلو له دې بهیر سره پرېکون اعلان کړی دی. دغه ټاکنیزې ډلې په اوسنیو شرایطو کې د رایو بیاشمېرنه غیر قانوني بولي او خپل ناظرین یې له دې بهیر وربللي دي.
د ثبات او همپالنې ټاکنیزه ډله وايي، د باطلو رایو تر مشخصولو او د رایو د سقف تر معلومولو مخکې، د هر محل د رایو تصفیه کولو بهیر پیل شوی چې دا یو غیر قانوني اقدام دی او د ټاکنو خپلواک کمېسیون باید قانون ماتونې ته د پای ټکی کېږدي. د دغه ټاکنیز ټیم په اعلامیه کې راغلي: ((کمېسیون دا پرېکړه داسې مهال کړې چې تکراري رایې، هغه رایې چې د ټاکنو د پيل او پای تر وخت مخکې او وروسته کارول شوې او همدا راز تقلبي رایې تر اوسه نه دي تصفیه شوې. د دې تر څنګ، ۲۴۳۲ داسې محلونه هم شته چې تر اوسه یې هېڅوک د موجودیت په اړه معلومات نه لري، هېڅ ډول بایومټریک معلومات یې په اړه نشته، خو د کمېسیون د تازه پرېکړې په اساس بیا شمېرل کېږي)).
د ثبات او همپالنې ټیم له همدې امله د رایو د بیاشمېرنې له بهیر سره پرېکون اعلان کړی او له کمېسیون غواړي چې تر هر څه وړاندې ديې یاد شوي موارد روښانه کړي او بیا دې د رایو بیاشمېرنې او تفتیش ته مخه کړي.
د نوماندانو شورا هم د ټاکنو خپلواک کمېسیون دغه کار غیر قانوني بللی دی. د رحمت الله نبیل او ګلبدین حکمتیار په مشرۍ ټاکنیزو ډلو هم د ثبات او همپالنې ډلې په څېر د رایو د بیاشمېرنې له بهیر سره پرېکون کړی دی.
بلخوا د ولسمشر غني په مشرۍ دولت ساز ټیم ویلي چې د ټاکنو خپلواک کمېسیون له اقداماتو ملاتړ کوي. دغه ټاکنیزې ډلې په تازه اعلامیه کې ویلي چې ټاکنیزې ډلې دې په غیر قانوني توګه د ثبوت له موجودیت پرته څرګندونې نه کوي او قوانینو ته دې درناوی وکړي. دوی له ټاکنیزو ډلو غوښتي چې د کمېسیون پرېکړو ته درناوی ولري.
