ټاکنو کمیسیون: د ځینو ستونزو له امله پایلې بیا پر وخت نه شو اعلانولولی

ټاکنو کمیسیون د یوې خبرپاڼې په خپرولو سره ویلي، د ځینو ستونزو له امله ښایي بیا هم د ټاکنو لومړنۍ پایلې پر خپلې ټاکلې نېټه اعلان نه شي. خبرپاڼه کاږي، ټاکنو کمیسیون د خپل کار له پیله تر اوسه هڅه کړې ده چې د خلکو د پاکو رایو پر بنسټ رڼې پایلې اعلان کړي نو په همدې موخه یې د هېواد په ډېریو ولایتونو کې د هغو رایو بیا شمېرنه او تفتیش له سره پیل کړی دی چې په اړه یې شکونه او شکایتونه موجود وو. د سرچینې په خبره کمیسیون په دې برخه کې، ورترغاړې دنده تر سره کړې ده او ټولو ولایتونو ته یې خپل کارکوونکي، څارونکي او د نوماندانو ناظرین لېږلي دي څو د دې پروسې څارنه وکړي خو په ډیریو ولایتونو کې یې د ځینو نوماندانو د پلویانو له لوري د کار مخه نیول شوې ده چې دوی یې اندېښمن کړي دي. کمیسیون دغه راز زیاته کړې، دوی د ټاکنیز مهالوېش د رعایت لپاره خپله ټوله هڅه کړې ده خو د ځینو ننګونو او ستونزو له امله، بیا هم اندېښنه لري چې ښایي لومړنۍ پایلې پر ټاکلې نېټه (د لړم په ۲۳مه) اعلان نه شي.