برېتانیا په افغانستان کې د خپلو ځواکونو جنګي جنایتونه پټوي

برېتانیا په عراق او افغانستان کې د خپلو ځواکونو پر جنګي جنایتونو پرده غوړوي. د راپورونو له مخې د برېتانیا حکومت هڅه کوي هغه قضیې پټې کړي، چې په افغانستان او عراق کې په جنګي جنایتونو کې ددغه هېواد د ځواکونو ښکېلتیا ښيي. په دې اړه د یوې پلټونکې ډلې غړي ویلي دوی ښکاره اسناد لري چې ښيي برېتانوي ځواکونو په افغانستان او عراق کې جنګي جنایتونه ترسره کړي خو د برېتانیا حکومت یې د نورو پلټنو مخه نیولې ده. په افغانستان کې د ناټو د ۱۹ کلن ماموریت په لړ کې ددغه سازمان د غړو هېوادونو سرتېرو ډول ډول جنګي جنایتونه ترسره کړي دي. دوی عام افغانان وژلي، زنداني کړي، ربړولي او حیثیت ته یې زیان رسولی دی. د جرمونو نړیوالې محکمې څو ځله وغوښتل دغه جنایتونه وڅېړي خو تر دې دمه پر خپل کار بریالۍ شوې نه ده. دغه راپورونه داسې مهال خپرېږي چې همدا تېره ورځ د امریکا ولسمشر ډونالډ ټرمپ د عامو افغانانو په وژنه تورن دوه امریکايي عسکر له محاکمې پرته وبښل.