کابل ښاروالي: د ترافیکي نظم ساتلو لپاره ۳۰۰ کسان په دندو ګومارو

کابل ښاروالي وایي چې د ترافیکي ستونزو د ختمولو لپاره لسګونه کسان پر دنده ګوماري. د کابل ښاروال احمد ذکي سرفراز وایي چې ۳۰۰ کسان د کابل ښاروالۍ د ترافیکو د انسجام ریاست په چوکاټ کې پر دندو ګومارل کېږي. دده په خبره، دغو کسانو ته ځانګړې روزنه ورکول کېږي، څو ورسپارل شوې دنده په ښه توګه ترسره کړي. د کابل ښاروال د معلوماتو له مخې دغه کسان به د ترافیکو له پولیسو سره په ګډه په ښار کې د ترافیکو بهیر په تنظیم کې مرسته کوي. د ده په وینا، تر اوسه له یادو ۳۰۰ کسانو ۴۳ یې ګومارل شوي او کار یې پیل کړی دی. کابل ښاروالي داسې مهال ددغه اقدام خبر ورکوي چې په کابل ښار کې د لارو بندوالي د خلکو شکایتونه ډېر کړي دي. کابل ښاریان په ساعتونو ساعتونو د ښار په څلور لارو کې بند پاتې وي خو د ترافیکو چارواکي تر اوسه ددغه ستونزې په حل نه دي بریالي شوي.