سره له دې چې د ټاکنو خپلواک کمېسیون د شفافو ټاکنو د تر سره کېدو ژمنه کړې وه، خو دغه کمېسیون بریالی نه شو چې له دې بهیر د ولس تمه او هیله پوره کړي. تازه د افغانستان ټاکنې د نوو ناندریو لامل شوې دي او ټاکنیزې ډلې یې د یو بل پر وړاندې درولې دي. ټاکنو کمېسیون پر دې تورن شوی چې د یوه خاص ټاکنیز ټیم فرمایشونه عملي کوي او خپله بې طرفي نه ساتي. د ثبات او همپالنې ټاکنیزې ډلې نوماند ډاکټر عبدالله عبدالله وایي، کمېسیون باید ځان بې طرفه وساتي، قوانینو ته درناوی وکړي او د یوې ټاکنیزې ډلې فرمایش دې نه مني.
تېره ورځ د هېواد په ډېری ولایتونو کې د ځینو محلونو د رایو بیاشمېرنه پيل شوه. ورسره جوخت د ثبات او همپالنې ټاکنیزې ډلې خبري کنفرانس درلود او ویل یې، دوی د بیاشمېرنې له پروسې سره موافق نه دي. کمېسیون بیا وايي چې دوی د ټولو ټاکنیزو ډلو په مشوره او همکارۍ دغه پروسه پيل کړې ده او هېڅ ډول قانوني ستونزه نه لري. خو د ثبات او همپالنې ټاکنیزې ډلې نوماند ډاکټر عبدالله عبدالله بیا وايي، چې کمېسیون په غیر قانوني توګه د رایو بیاشمېرنه پیل کړې ده. د ده په خبره، د دوی ناظرین او یا هم د نورو نوماندانو ناظرین په دې پروسه کې نظارت نه کوي چې له همدې امله قانوني مشروعیت نه لري او پایله یې دوی ته د منلو نه ده.
ډاکټر عبدالله عبدالله وایي چې د ټاکنو کمېسیون د دوی قناعت نه دی حاصل کړی، نو ځکه د رایو د بیاشمېرنې په پروسه کې ګډون نه کوي . عبدالله زیاته کړې: ((موږ د رایو د بیاشمېرنې په پروسه کې ونډه نه اخلو. که کمېسیون پر خپله دې پرېکړه بیاکتنه ونه کړي، نو خپله بې طرفي تر پوښتنې لاندې راولي. نو په دې صورت کې به بیا موږ خپله بله پرېکړه وروسته اعلان کړو)).
عبدالله عبدالله دغه راز په خپلو پرونیو څرګندونو کې دا هم وویل چې د ټاکنو خپلواک کمېسیون له دولت جوړوونکي ټیم ملاتړ کوي. هغه وویل: ((په هر ځای کې چې تقلب دی، دولت ساز ټیم دفاع ترې کوي. د ټاکنو له خپلواک کمېسیون مو نه دا تمه وه او نه یې لرو، چې د دولت ساز ټیم د ویاند دنده تر سره کړي)).
ټاکنو کمېسیون په ډېرو ولایتونو کې د رایو بیاشمېرنه پيل کړه، خو له دې ډلې په ځینو ولایتونو کې خلکو اعتراض وکړ او د رایو د بیاشمېرنې مخنیوی یې وکړ. کندوز هم یو له هغو ولایتونو و چې د ثبات او همپالنې ټیم پلویانو د رایو د بیاشمېرنې مخالفت پکې وکړ او په دې لړ کې شخړه وشوه، چې د دغه ټاکنیز ټیم یو ناظر په دې پېښه کې وژل شوی دی. عبدالله عبدالله پر دې هم نیوکه وکړه چې حاکم ټیم له امنیتي ځواکونو د سیاسي موخو لپاره کار اخلي.
ده وویل، دا مشخصه نه ده چې دغه ناظر د چا لخوا وژل شوی، خو وایي، امنیتي ځواکونو ته امر شوی چې پر خلکو ډزې وکړي. عبدالله وویل: ((په داسې شرایطو کې چې د ترهګرۍ ضد جګړه روانه ده، امنیتي ځواکونو ته امر کېږي چې پر خلکو ډزې وکړي. هر څوک چې دغه امر ورکوي بیا یې دې پایلو ته هم ځواب ووايي)).
پخواني ولسمشر حامد کرزي هم په کندوز کې پر لاریون کوونکو ډزې غندلې دي. نوموړي په یوه اعلامیه کې ویلي چې امنیتي ځواکونه د ارضي تمامیت او ملي ګټو ساتونکي دي، نو ټاکنیزې ډلې دې دوی د سیاسي موخو او سیالیو لپاره نه کاروي. د نوموړي په خبره، د مسوولینو له لوري په ورته مواردو کې د امنیتي ځواکونو کارول د هېواد په خیر نه دي او باید دغه لړۍ ودرول شي. د ولسمشر ویاند صدیق صدیقي بیا د ډاکټر عبدالله عبدالله دغه تورونه ردوي او وایي، له امنیتي ځواکونو تر اوسه هېڅ داسې شکایت نه دی ثبت شوی.
بلخوا د نوماندانو شورا هم په یوه اعلامیه کې ویلي چې دوی د رایو د بیاشمېرنې له پروسې سره مخالف دي او د کمېسیون پرېکړه قانوني نه ده. د دوی په خبره، دغه شورا لا هم پر خپل پخواني دریځ ټینګار کوي او له کمېسیون تمه لري چې قوانینو ته درناوی وکړي.
سره له دې چې کمېسیون خپلې پرېکړې قانوني بولي، خو د ټاکنیزو ډلو ډېرو پلویانو په ځینو ولایتونو کې د کمېسیون دروازې تړلې دي او د دوی کارکوونکو ته د رایو د بیاشمېرنې اجازه نه ورکوي.
بلخوا د دولت جوړوونکي ټیم لومړي مرستیال امرالله صالح بیا د ډاکټر عبدالله عبدالله پر وروستیو څرګندونو غبرګون ښودلی دی. ده ویلي چې د ثبات او همپالنې ټیم ټاکنې بایللې دي، نو له دې امله د کمېسیون پرېکړو ته درناوی نه کوي. د ده په خبره، د کمېسیون غړي د ټولو نوماندانو له لوري ټاکل شوي دي، نو له دې امله دوی پر دې باید تورن نه شي چې د دولت جوړوونکي ټیم ملاتړ کوي.
