په دې وروستیو کې د امنیتي ځواکونو ځينو کړنو پراخ غبرګونونه پارولي دي. پرون په رسنیو کې داسې راپورونه خپاره شول چې افغان ځواکونو په کندوز کې پر لاریون کوونکو ډزې وکړې، خو وروسته کورنیو چارو وزارت دغه راپورونه رد کړل. دغه پېښه د ډېرو افغان چارواکو له لوري وغندل شوه. پخواني ولسمشر حامد کرزي هم وویل چې ځینې کړۍ له افغان ځواکونو د سیاسي او شخصي موخو لپاره ګټه اخلي. پخواني ولسمشر دغه راز ویلي چې د امنیتي ځواکونو له لوري د ملکي وګړو د کورونو نړول هم جنایت دی او باید د دې کارونو مخنیوی وشي.
څه موده وړاندې په میدان وردګو ولایت کې افغان ځواکونو د یوه بېس د جوړولو لپاره د عامو وګړو کورونه ونړول او هلته یې خپل سرتېري ځای پر ځای کړل. له دې سره جوخت ویل کېږي چې افغان ځواکونو په تازه پېښو کې بیا هم د خلکو د کورونو په نړولو لاس پورې کړی دی او په خبره یې موخه دا ده چې د لویې لارې امنیت خوندي کړي. هغه مهال په ولسي جرګه کې د میدان وردګو ولایت د خلکو استازو د حکومت پر دغه کړنه سخته نیوکه کړې وه او ژر تر ژره یې د حکومت له لوري د قانع کوونکي ځواب غوښتنه کړې وه.
تازه پخواني ولسمشر حامد کرزي په افغانستان کې د ملګرو ملتونو د مرستندویه دفتر له مشر تادامیچي یاماموتو سره کتلي دي او له نوموړي سره یې د عامو افغانانو د کورونو د نړولو موضوع شریکه کړې ده. د ده په خبره، افغان ځواکونو د عامو خلکو کورونه نړولي دي او دا بشري جنایت دی چې ملګري ملتونه باید ورته متوجه وي. پخواني ولسمشر دا هم ویلي چې یوناما دې د ملګرو ملتونو له ماموریت سره په همغږۍ، د بشري حقونو د دغه ډول نقض مخنیوی وکړي او د مظلومو افغانو غږ دې نړیوالې ټولنې ته ورسوي.
پخواني ولسمشر د ټاکنو په اړه هم خپلې اندېښنې د ملګرو ملتونو له استازي سره شریکې کړې دي او ټینګار یې کړی چې دغه بنسټ دې د یوې بې طرفه نړیوالې مرجع په توګه د افغانستان د ټاکنو په مسئله کې همکاري وکړي. تادامیچي هم په یادو مواردو کې د همکارۍ ډاډ ورکړی دی او ویلي یې دي چې دوی د بشري حقونو خوندیتوب ته ژمن دي او هېچا ته اجازه نه ورکوي چې بشري حقونه تر پښو لاندې کړي.
پخواني ولسمشر تر دې وړاندې هم د سیاسي او شخصي اهدافو لپاره د افغان ځواکونو کارونه د هېواد په زیان بللي وو او ټینګار یې کړی و چې حکومتي چارواکي دې د خپلو شخصي موخو لپاره د افغان ځواکونو کارونه ودروي. د ده په خبره، دغه ځواکونه د هېواد د ملي ګټو د دفاع دنده لري او هغه کسان یې چې د شخصي موخو لپاره کاروي، د هېواد له قوانینو ښکاره سرغړونه کوي.
د افغان ځواکونو له لوري د ملکي وګړو د کورونو نړول داسې مهال غبرګون پاروي، چې د تازه راپورونو له مخې، په میدان وردګو ولایت په تېره په سیداباد ولسوالۍ کې یو ځل بیا هم د ملکي وګړو کورونه نړول شوي دي. سره له دې چې په دې اړه مو پوره جزیات تر لاسه نه شوی کړی، خو په ولسي جرګه کې د میدان وردګو وکیلان وایي چې دغه مسئله یې له لوړپوړو افغان چارواکو سره مطرح کړې ده.
د ولسي جرګې غړی عبیدالله کلیمزی وایي، چې د افغان ځواکونو له لوري د نظامي اډې جوړولو او پراخولو لپاره د ملکي وګړو کورونه نړول شوي دي، چې په هېڅ صورت د منلو نه دي. د ده په خبره، دا د بشري حقونو نقض دی او حکومت باید په دې اړه د ولس استازو ته ځواب ووايي.
د ولسي جرګې غړی عبدالرحمن وردګ هم وایي چې په میدان وردګو ولایت کې د افغان ځواکونو عملیاتو نه یوازې دا چې امنیت نه دی راوستی؛ بلکې ډېرې ستونزې یې زیږولې دي. د ده په خبره، د عامو وګړو د کورونو نړېدو مسئله یې له ملي دفاع وزارت سره مطرح کړې او چارواکو ډاډ ورکړی چې دغه ستونزه به ژر تر ژره حل کړي.
بلخوا د سیداباد ولسوالۍ د ملي خيلو اوسېدونکي هم وایي چې حکومتي ځواکونو یې کورونه نړولي دي او د دې کورونو پر ځای یې نظامي اډه جوړه کړې ده. دوی له حکومته غوښتي چې دوی ته قانع کوونکی ځواب ووایي او له ورته کړنو لاس په سر شي.
