د بشري حقونو خپلواک کمیسیون: د سولې د مذاکراتو لپاره باید هڅې چټکې کړل شي

د بشري حقونو خپلواک کمیسیون وایي چې د بین الافغاني خبرو د پيل لپاره باید هڅې چټکې شي. ددغه کمیسیون له لوري په خپره شوې خبرپاڼه کې راغلي، چې د جګړو دوام د بشري حقونو د نقض سبب دی او زرګونه کسان یې خپلو اساسي حقونو ته له لاسرسي محروم کړي دي. یاد کمیسیون وایي چې جګړې پر زده کړو، پرمختګ، روغتیايي خدماتو، سوداګرۍ، تګ راتګ او پرمختګ منفي اغېز کړی دی او باید نور د خبرو له لارې ودرول شي. کمیسیون همدا راز وایي چې دوی د سولې په برخه کې هر ډول همکارۍ ته تیار دي او ددې شدیده اړتیا لیدل کېږي چې بین الافغاني خبرې پيل شي. سرچينې زياته کړې، د کمېسيون راپورونه د ملکي مرګ ژوبلې د بې مخينې او لړزوونکي زياتوالي ښکارندويي کوي اوروانه جګړه روغتيايي، ښوونيزو خدماتو او عدالت ته د هېوادوالو د لاسرسي خنډ ګرځېدلې ده. دغه کمیسیون پر ټولو ښکېلو لورو غږ کړی چې د بشري حقونو د خوندیتوب، ثبات او دایمي سولې لپاره باید خبرې پيل کړي او جګړه ودروي.