ټاکنو کمېسیون: د ولسمشرۍ ټاکنو لومړنۍ پایلې به سبا اعلان کړو

د ټاکنو خپلواک کمېسیون وایي سبا یکشنبه به د ولسمشریزو ټاکنو لومړنۍ پایلې اعلان کړي. د کمېسیون د دارالانشاء ریيس وايي، د پاتې اوو ولایتونو د رایو بیا شمېرلو بهیر بشپړ شوی او په اطلاعاتي بانک کې د بغلان، بدخشان او فاریاب د پایلو د پاڼو له رسولو سره سم به لومړنۍ پایلې اعلان شي. د ټاکنو خپلواک کمېسیون تېره ورځ ویلي وو چې د شنبې په ورځ د ولسمشریزو ټاکنو د لومړنیو پایلو د اعلان لپاره له تخنیکي پلوه چمتووالی لري. د ولسمشر دویم مرستیال سرور دانش هم پرون د ټاکنو له کمیسیون وغوښتل چې هر څومره ژر کوالی شي د ټاکنو لومړنۍ پایلې دې اعلان شي. بل خوا هغه ټاکنیزې ډلې چې د پنجشېر، بدخشان، بغلان، سرپل، فاریاب، جوزجان او تخار ولایتونو د رایو په بیا شمېرنه کې حضور درلود وایي باید هغه ټاکنیزې ډلې چې ډېرې درغلۍ یې کړې دي؛ عدلي او قضايي ادارو ته ور وپيژندل شي.