د شکایاتو کمیسیون د شکایتونو ارزونه پيل کړې ده

د شکایتونو کمیسیون نن د ولسمشریزو ټاکنو په تړاو د ثبت شوو شکایتونو څېړنه پيلوي. ددغه کمیسیون غړو رسنیو ته ویلي چې زرګونه شکایتونه ثبت شوي دي او دوی به د نن ورځې په ارزونه کې دا وګوري چې څومره جدي دي او دقیق کار ته اړتیا لري. د معلوماتو له مخې دغه کمیسیون ته ۱۶ زره او ۲۰۰ شکایتونه ثبت شوي دي. د شکایتونو شمېر ته په کتو داسې اندېښنه شته چې ښایي کمیسیون په وخت پرېکړه و نه شي کړلی او ټول شکایتونه و نه شي ارزولی، خو ددغه کمیسیون غړي وايي چې دوی به خپل کار پخپل وخت بشپړ کړي. پرون د شکایتونو د ثبت وروستۍ ورځ وه او له نن تر پنځلسو ورځو پورې به دغه شکایتونه ارزول کېږي او وروسته به د شکایاتو کمیسیون د خپلو کارونو پایله د ټاکنو خپلواک کمیسیون ته سپاري څو وروستۍ پایلي اعلان کړي.