ازبکستان: دا ځل به د افغان سولې روان بهیر پایلې ته ورسېږي

د ازبکستان د بهرنیو چارو وزیر وایي داځل به د افغان سولې بهیر پایلې ته ورسیږي. عبدالعزیز کاملوف چې د ازبکستان په پلازمېنه تاشکند کې یې په یوه خبري کنفرانس کې خبرې کولې، وویل دوی له افغان سولې ملاتړ کوي او تمه لري چې دغه پروسه بریالۍ شي. دده په خبره دوی هم پر خپل وار د افغان سولې په برخه کې خپلې همکارۍ او هڅې کړې دي او دې ته لیواله دي چې افغان جګړه دخبرو له لارې پای ته ورسېږي. دغه ازبکستاني چارواکي ویلي تل یې هڅه کړې چې د سولې په تړاو له ښکېلو اړخونو سره اړیکه ونیسي او مثبت رول ادا کړي. ازبک چارواکو تر دې وړاندې هم د افغان سولې په اړه څرګندونې کړې وې او په دې برخه کې یې د همکارۍ ډاډ ورکړی دی. د افغان سولې په پروسه کې ددغه هېواد رول هم مهم ګڼل کېږي.