اسوشیټډ پرس: د سولې تړون یو مهم شرط د طالب زندانیانو خوشې کول دي

یو طالب چارواکي اسوشیټډ پرس خبري اژانس ته ویلي چې له امریکا سره د سولې تړون د لاسلیک یو مهم شرط د طالب زندانیانو خوشې کول دي او دا موضوع د سولې تړون کې لیکل شوې ده. راپور کاږي، یو طالب چارواکي چې د نوم نه ښودو په شرط یې ورسره خبرې کړې دي ویلي، طالبانو د خپلو زنداني ملګرو یو لیست هم امریکایي پلاوي ته سپارلی دی او د هغوی د خوشې کولو موضوع د دواړو لوریو د هوکړې په متن کې ځای پر ځای شوې ده. راپور د خپلې سرچینې له قوله لیکي، د طالب زندانیانو خوشې کېدل هغه څه دي چې دوی یې په افغانستان کې د روانې جګړې د پای لپاره مهم بولي خو د چارو ځینې شنونکي بیا په دې باور دي چې ښایي د طلب زندانیانو خوشې کول د سولې پروسه تر سیوري لاندې راولي. د یادونې ده چې وړاندې تر دې هم ځینې امریکایي چارواکو د طالب زندانیانو خوشې کېدل د سولې تړون یوه برخه بللې وه.