نشنل انټرسټ: امریکا جګړه وبایلله خو زړونه باید وګټي

نشنل انټرسټ خپرونې د امریکایي مشرانو له لوري د افغانستان په اړه د واشنګټن پوسټ ورځپاڼې خپرو شویو اسنادو ته په اشارې ویلي، امریکایان باید له دې جګړې درس واخلي او بیا داسې نه جبرانېدونکي تېروتنې تکرار نکړي. د سرچینې په وینا، امریکا پر دې اوږدې جګړې په میلیاردونو ډالر ولګول او په زرګونو پوځیان یې قرباني کړل خو پایله یې د امریکایي مشرانو له دروغو پرته بل هیڅ هم نشوه. د سرچینې په وینا، امریکا د دې جګړې د ګټلو توان له لاسه ورکړی دی او هغه څه چې اوس مهم دي، هغه دا دي چې د خلکو زړونه وګټي. راپور کې وړاندې راغلي، امریکا باید اوس افغانانو ته هغه څه وکړي چې هغوی یې په تمه دي او هغه په لومړي قدم کې سوله او د افغان امنیتي ځواکونو دوامداره ملاتړ دی چې دا چاره هلته له حضور پرته هم په ښه ډول ترسره کېدای شي. سرچینه لیکي، امریکا تل په ناپایه جګړو بې ځایه لګښت کړی دی او له دې وروسته باید د خپلو لګښتونو لپاره مشخصه او واضح تګلاره ولري.