طالبان وایي، دوی اوربند نه، بلکې د اوربند پر ځای د یوې دویمې لارې په لټه کې دي. وسله والو طالبانو ته نږدې سرچینې وایي چې طالبانو یوازې د تاوتریخوالي پر کمولو سلا مشورې کوي او اوربند هسې د رسنیو تبلیغات بولي. غربي رسنیو او د کورنیو رسنیو ځینو سرچینو په دې وروستیو ورځو کې داسې راپورونه خپاره کړل، چې ګواکې طالب مشران په خپلو کې پر یوه لس ورځني یا اووه ورځني اوربند هوکړې ته رسېدلي دي. طالبانو بیا پرون دغه راپورنه رد کړل او هغه یې د رسنیو تبلیغات وبلل.
سره له دې چې د سولې هوکړې د لاسلیک لپاره پر طالبانو د امریکا تر ټولو مهم شرط د اوربند رامنځ ته کول او بین الافغاني خبرو ته تیاری ښودل دی، خو دغه ډله اوربند نه مني. تازه وسله والو طالبانو ویلي چې دوی د اوربند پر ځای د یوې بلې دویمې لارې په لټه کې دي، چې یوازې تاوتریخوالی راکم کړي، خو اوربند به نه رامنځ ته کېږي. وړمه ورځ اسوشټېډ پرېس خبري آژانس طالبانو ته د نږدې سرچینو په حواله راپور ورکړی و، چې طالبان په خپلو کې پر لس ورځني اوربند سلا شوي دي او تمه ده چې ژر تر ژره دغه اوربند پيل شي.
د دې تر څنګ، ځینو نورو رسنیو بیا دا راپورونه هم ورکړي چې د کوټې او پېښور شورا طالبان پر اوربند هوکړې ته رسېدلي، خو په هلمند کې د دې ډلې نظامي قومندانان د اوربند مخالفت کوي. په همدې تړاو د طالبانو د قطر دفتر یو پلاوی د ملا برادر په مشرۍ پېښور، کوټې او ویل کېږي چې هلمند ته هم سفر کړی و. طالبانو تېره ورځ د یوې اعلامیې په خپرولو سره ویلي چې دوی اوربند نه کوي، خو یوازې د تاوتریخوالي پر کمولو سلا مشورې روانې دي. د دې ډلې ویاند ذبیح الله مجاهد په یوه خپره کړې اعلامیه کې ویلي طالبان د اوربند تصمیم نه لري. هغه زیاته کړې: «له څو ورځو را پدېخوا ځينې رسنۍ د اوربند په اړه غلط او له حقیقته لرې راپورونه خپروي. واقعیت دا دی چې اسلامي امارت د اوربند کوم تصمیم نه لري، امریکایانو د جګړې کمولو غوښتنه کړې، چې د اسلامي امارت په جهت کې په همدې مشخصه مسئله مشورې روانې دي».
بلخوا طالبانو ته نږدې سرچینې بیا وایي چې طالبان د اوربند پر بديله لار فکر کوي. د سرچینې په خبره، طالبان غواړي تاوتریخوالی راکم کړي، خو که کومه چاودنه او یا امنیتي پېښه کېږي، دا به د اوربند د ماتېدو په مانا نه وي، بلکې دواړه لوري باید پېښه وڅېړي. د سرچینې په خبره: «طالبان د اوربند پر متبادل کار کوي او دا د تاوتریخوالي کمول او د سولې توافقنامې لپاره د مناسبې فضا برابرول دي. د مناسبې فضا د برابرولو موده اووه ورځې ټاکل شوې او که په دې ورځو کې کومه چاودنه او برید کیږي، دا به د اوربند د نقض په مانا نه وي او دواړې خواوې به د پېښې په اړه تحقیق کوي».
سرچینې وايي، امریکایان به په دې یوه اونۍ کې د سولې هوکړې لاسلیکولو ته زمینه برابروي او طالبان به دې ته نه اړ ایستل کیږي، چې دغه موده وغځوي. خو دا د طالبانو له خوا احتمالي وړاندیز دی او په دې تړاو د امریکا دریځ لا روښانه نه دی.
بل پلو د سولې په چارو کې د دولت وزارت بیا پر اوربند ټینګار کوي او وایي، د افغان حکومت او امریکا تر ټولو مهم شرط اوربند او د جګړې کمول دي. د دغه وزارت ویانده ناجیه انوري وایي، طالبانو ته پکار ده چې اوربند ته غاړه کېږدي او تر هغه وروسته دې د سولې بین الافغاني مذاکرات پيل کړي.
د اوربند او تاوتریخوالي د کمولو په اړه داسې مهال خبرې کېږي، چې په دې وروستیو کې د افغان ځواکونو او طالبانو تر منځ نښتو او جګړو زور اخیستی دی. دواړو لورو ته هره ورځ درنې مرګ ژوبلې اوړي او خلک هم دې ته هیله من دي چې ژر تر ژره د سولې هوکړه لاسلیک شي او تاوتریخوالی پای ته ورسېږي.
