د شکایتونو کمېسیون: د جنجالي رایو له ارزونې وړاندې هېڅ قضاوت نشو کولی

د ټاکنیزو شکایتونو کمېسیون ویلي، تېرو ولسمشرۍ ټاکنو کې د هغو رایو په اړه ورته جدي شکایتونه رسېدلي چې غیر بایومټرېک دي، او یا هم د رایې اچونې له رسمي وخت نه مخکې او یا هم وروسته اچول شوې دي. د یاد کمېسیون ویاندې زرمینې کاکړ ویلي، هغه درې لکه جنجالي رایې هم په همدې ډله کې راځي چې ځینې نوماندان یې د باطلېدو غوښتنه کوي. کاکړ وایي، د ټاکنیزو شکایتونو کمېسیون د دې رایو له سمې او جدې ارزونې نه وړاندې په دې اړه هېڅ قضاوت نشي کولی. نوموړې وايي، د لومړنیو پایلو په اړه د ټولو شکایتونو لپاره د ورکړل شوو ۱۵ ورځو موده کمه ده او ښایي نور وخت ته اړتیا وي چې ټول شکایتونه و ارزول شي. د ټاکنیزو شکایتونو کمېسیون وايي دوی ته د ټاکنیزو ډلو له لوري د ثبت شویو شاوخوا ۱۶۵۰۰ شکایتونو له ډلې نږدې ۲ زره شکایتونه بې اسناده او بې دلیله ده چې د قانون له مخې به رد شي. د یاد کمېسیون په وینا له ۶۰۰ ډېر شکایتونه له موضوع سره هېڅ اړیکه نه لري، نږدې ۷ زره شکایتونه د رایو او شاوخوا ۹۰۰ شکایتونه د اشخاصو په اړه دي.