کابل ته را کډه شوې کورنۍ د مرستې غوښتنه کوي

په کابل کې یو شمېر کورنۍ او له بهرنیو هېوادونو راستانه شوي کډوال چې د کډوالو په کمپونو کې ژوند کوي وايي، له خوراکي توکو پرته خېمو کې تر واورو لاندې د ژمي سړې شپې سبا کوي. دا کورنۍ چې د نا امنیو او وزګارتیا له کبله له بلخ، کندوز، هلمند او ځینو نورو ولایتونو نه کابل ته راکډه شوي وايي، د کور تودولو لپاره د سوند توکي نه لري او د حکومت په ګډون، بل هېڅ بنسټ ورسره مرسته نه ده کړې. په همدې حال کې له ګاونډیو هېوادونو یوشمېر راستانه شوي کډوال هم د اوسېدو د ځای او د ژوند د لومړنیو امکاناتو نه لرلو له کبله سر ټکوي. خو د کډوالو او بېرته راستنېدونکو چارو وزارت وايي، حکومت به ډېر ژر د نړیوالو بنسټونو په همکارۍ په ټولو ولایتونو کې له اړمنو، بې‌ځایه شویو او له بهره راغلو کډوالو سره ژمنۍ مرستې وکړي.