د ټاکنیزو شکایتونو کمېسیون د زرګونو شکایتونو ارزونه پيل کړې ده، خو تازه شکایت کوي چې د ټاکنو خپلواک کمېسیون ورسره په ځينو مواردو کې همکاري نه کوي. سره له دې چې د شکایتونو کمېسیون له ټاکنیزو شکایتونو کمېسیون سره د ښو اړیکو خبره کوي، خو وایي چې د رایو ډېټابېس ته په لاسرسي کې د ټاکنو خپلواک کمېسیون همکاري نه ورسره کوي. د شکایتونو کمېسیون وایي چې د رایو د شمېر او بایومټریک شوو رایو په اړه زرګونه شکایتونه ثبت شوي او دوی دغو شکایتونو ته د قانع کوونکي ځواب لپاره اړ دي چې د رایو ډېټابېس ته لاسرسی ولري. د ټاکنو خپلواک کمېسیون بیا وایي، دوی له ټاکنیزو شکایتونو کمېسیون سره د قانون په چوکاټ کې هر ډول همکارۍ ته تیار دي.
پرون د ټاکنیزو شکایتونو خپلواک کمېسیون غړو په یوه خبري غونډه کې په خپلو چارو کې د پرمختګونو په اړه معلومات ورکړل. د دغه کمېسیون غړو وویل چې په ۳۱ ولایتونو کې زرګونه شکایتونه کټهګوري شوي دي او څېړنه یې پيل شوې ده. د دوی په خبره، د هېواد په ۳۱ ولایتونو کې ۳۲۷۲ شکایتونه د ټاکنیزو جرمونو، ۴۳۰۳ شکایتونه د ټاکنیزو سرغړونو او تخلفاتو په تړاو او پاتې ۱۳۷۱ شکایتونه د ټاکنیزو تېروتنو په اړه دي.
د شکایتونو کمېسیون رییسه زهره بیان شینوارې وایي، د ټاکنو خپلواک کمېسیون له دوی سره د درملوګ کمپنۍ معلوماتي بانک نه دی شریک کړی. د نوموړې په خبره، دوی د رایو د تفکیک او شمېر د تثبیتولو لپاره دغو معلوماتو ته لاسرسي ته اړ دي او که کمېسیون همکاري ونه کړي، نو ښايي کار یې له ځنډ او خنډ سره مخ شي. د نوموړې په خبره، د ټاکنو خپلواک کمېسیون له دوی سره تر دې دمه په یاده برخه کې همکاري نه ده کړې او دا چاره د دې سبب شوې، چې په دې تړاو د ثبت شوو شکایتونو د څېړنې پروسه ټکنۍ پر مخ لاړه شي.
شینوارې بیا همدار زا وویل چې دوی خپلې چارې په پوره شفافیت مخ ته وړي او په خبره یې، د هېڅ لوري ملاتړ به ونه کړي؛ بلکې ټولو شکایتونو ته به په بې طرفه توګه رسیدهګي وکړي. د شینوارې په خبره، که د ټاکنو خپلواک کمېسیون په اړینو مواردو کې همکاري ورسره وکړي، نو دوی به په ټاکلې نېټه کې ټول شکایتونه وڅېړي او همدا راز به پر دې بریالي شي چې خپله پرېکړه په خپل وخت اعلان کړي.
د شکایتونو کمېسیون یو بل غړی هم پر دې ټینګار کوي، چې د ځينو شکایتونو د څېړنې لپاره باید د معلوماتو مرکزي بانک ته لاسرسی ولري. د دغه کمېسیون غړی او ویاند قاسم الیاسي وایي: «ځینې شکایتونه جدي دي، په اړه یې باید مرکزي سیسټم ته مراجعه وشي، خو د ټاکنو خپلواک کمېسیون چارواکي په دې اړه همکاري نه کوي».
بلخوا د ټاکنو خپلواک کمېسیون بیا وایي چې دوی د قانون په چوکاټ کې هر ډول همکارۍ ته تیار دي. د دغه کمېسیون یو ویاند عبدالعزیز ابراهیمي وایي: «د قانون په چوکاټ کې موږ تیار یو چې د ټاکنیزو شکایتونو له خپلواک کمېسیون سره همکاري وکړو».
د ټاکنیزو شکایتونو خپلواک کمېسیون وړمه ورځ هم ویلي وو، چې زرګونه شکایتونه ورته ثبت شوي چې له دې ډلې د څه باندې اتو زرو شکایتونو څېړنه ضروري ده او پر لومړنیو پایلو به اغېز ولري. پر ټاکنو څارونکي بنسټونه هم وایي چې که کمېسیون په سمه توګه د شکایتونو څېړنې ته پاملرنه وکړي، نو پر لومړنیو پایلو ښايي اغېز وکړي او ټاکنې دویم پړاو ته لاړې شي.
