مشرانو جرګه: د اساسي قانون ستر ناقضین لوړپوړي حکومتي چارواکي دي

د مشرانو جرګې غړي وایي د اساسي قانون تر ټولو ستر ناقضین د حکومت لوړپوړي چارواکي دي. د مشرانو جرګې غړو پرون د اساسي قانون د شپاړسمې کلیزې د نمانځنې په تړاو ویلي چې افغانستان د سیمې په کچه تر ټولو غوره اساسي قانون لري. ددوی په خبره له بده مرغه چې دغه قانون تر ډېره د لوړپوړو چارواکو له لوري نقض کېږي. دوی ددې غوښتونکي دي چې د اساسي قانون ناقضین باید محاکمه شي او خپله جزا وویني. سناتورانو همدا راز د هېواد د امنیتي وضعیت په تړاو هم اندېښنه ښودلې او په خبره یې امنیتي ادارې په دې نه دي بریالۍ شوې چې وضعیت کنټرول کړي او یا لږ تر لږه امنیتي پېښې تر یوې کچې راکمې کړي.