سره له دې چې د ژمي موسم په را رسېدو سره د ځانګړو ځواکونو شپني عملیات یو څه کم شوي دي، خو بیا هم دغه ځواکونه په ځينو سیمو کې د عامو وګړو پر کورونو عملیات کوي، چې سخت غبرګونونه یې پارولي دي. د ولسي جرګې غړو هم پرون پر دې موضوع خبرې وکړې او له حکومته یې د دغو عملیاتو په اړه د پلټنو غوښتنه وکړه. وکیلان وایي چې ځانګړو ځواکونو په وروستیو ورځو کې په لغمان او کابل کې شپني عملیات تر سره کړي، چې عامو وګړو ته یې پکې مرګ ژوبله اړولې ده.
وړمه شپه د ملي امنیت ځانګړو ځواکونو د کابل ښار د خیر خانې سیمې په دویمه حصه کې شپني عملیات کړي دي. په دې عملیاتو کې یې د یوه پخواني جهادي قومندان آمر ستار او د هغه د زوی په ګډون، پنځه کسه وژلي دي. د آمر ستار د کورنۍ نږدې غړي او د پېښې عیني شاهدان وایي چې ځانګړو ځواکونو د دوی په کور کې سخت وحشت خپور کړ او دوه کسه یې له ځان سره بېولي هم دي. د دوی په خبره، د افغان ځواکونو دغه کړنه غیر قانوني ده، ځکه دوی د داسې کس پر کور شپني او خونړي عملیات کړي، چې د حکومت تر څنګ ولاړ و او په غوربند کې بانفوذه قومي مشر و. د آمر ستار یوه زوی هم له رسنیو سره په خبرو کې ویلي، چې پلار یې بې ګناه و او په خبره یې که یې کوم جرم لرلی، نو حکومت هغه له قانوني لارو نیولی او بیا بېولی شوای. آمر ستار په غوربند دره کې د جمعیت ګوند پخوانی قومندان و، چې اوسمهال یې په ټاکنیزو منډو ترړو کې د ولسمشر غني په مشرۍ د دولت ساز ټیم ملاتړ کاوه.
بلخوا په ولسي جرګه کې پر همدې مسئله وکیلانو خبرې وکړې او له حکومته یې وغوښتل چې دغه پېښې وڅېړي. د ولسي جرګې رییس او د دې جرګې ځینې غړي وايي، د لغمان مرکز مهترلام ښار اړوند کتب خېلو سیمه کې ځانګړو ځواکونو پر یو کور چاپه وهلې، چې یو سپین ږیری یې وژلی او د هغه څلور زامن یې بندیان کړي دي او دا ډول د کابل خیرخانې په سیمه کې د ملي امنیت ځواکونو یو پخوانی جهادي قوماندان آمر ستار، د هغه زوی او د کور د خاوند په ګډون، پنځه کسه وژلي دي.
بلخوا د ولسي جرګې ځینې غړي د امنیتي ځواکونو دغه ډول کړنې صحرايي محکمې بولي. د ولسي جرګې غړی ګل الرحمن همدرد وایي: «صحرايي محکمې دې بندې کړل شي، حکومت دې د قانون مطابق مجرمین یا تورن کسان نیسي، محاکمو او قانون ته یې دې سپاري، دوی یې مجازات کوي».
وکیلان دا د افغان امنیتي ځواکونو له لوري د ملکي وګړو وژل لومړنۍ پېښه نه بولي او په خبره یې، د دغو کړنو مخه باید ونیول شي، ځکه حکومت ولس ته مسوول دی او باید ځواب ووايي. د ولسي جرګې غړی ذبیح الله عتیق وایي: «دا لومړی ځل نه دی چې ملي امنیت داسې کوي، په دې کې د حکومت بې پلاني او ناتواني هم شامله ده. تر دې مخکې یې هم ملکیان وژلي، په یاد مو دي په ننګرهار کې یې څلور وروران په یوه ځای ووژل».
د ولسي جرګې یو بل غړی پرویز عرب زاده بیا وایي چې په لغمان کې هم ۰۲ قطعې یو ملکي وګړی په دغه ولایت کې د عملیاتو پر مهال وژلی او د وژل شوي کس د کورنۍ څلور غړي یې له ځان سره بېولي دي. هغه ویلي: «ما له والي سره خبرې وکړې، چې دا خو بې ګناه بزګر دی، دې څه کړي دي؟ هغه له دې پېښې هېڅ خبر نه و».
د ولسي جرګې رییس هم دغه پېښه وغندله او اړوند کمېسیون ته یې دنده وسپارله، چې دغه مسئله په هر اړخیزه توګه وڅېړي. میر رحمان رحماني وویل: «دا پېښه باید وڅېړل شي، آمر ستار د تېښتې سړی نه و، که یې کوم جرم لرلی، حکومت نیولی شوای».
د ولسي جرګې غړو داسې مهال د افغان ځواکونو پر شپنیو عملیاتو غبرګون ښودلی، چې تر دې وړاندې هم مدني فعالانو، د ټولنیزو رسنیو کاروونکو، سیاستوالو او رسنیو پر دغه عملیاتو نیوکې کړې دي او له حکومته یې د ورته خونړیو عملیاتو پر ځای، د عامو وګړو د ساتنې او د دوی د امنیت د تامین غوښتنه کړې ده.
