ولسمشر غني پرون په کابل کې د پولیسو د فراغت په یوه غونډه کې وویل، چې هېڅ افغان سرتېری د افغانانو د وژلو یا په نښه کولو حق نه لري. د ده په خبره، دوی باید قوانینو ته درناوی و لري او په وینا یې د چا د اعدام حکم یوازې افغان محاکم ورکولی شي. نوموړي پر دې ټینګار وکړ چې پولیس به خپلو اصلي دندو ته راګرځي او دوی باید په ډېرو کمو مواردو کې له وسلې کار واخلي. هغه د پولیسو په لیکو او کورنیو چارو وزارت کې پر اصلاحاتو او پرمختګونو هم ټینګار وکړ.
ولسمشر غني پرون په کابل کې د جنرال عبدالرازق د ملي پولیسو اکاډمۍ د یوولسمې دورې فارغانو ته په وینا کې وویل، پولیس باید هر ګام په پوره تدبیر واخلي او په خپلو چارو کې دې قانون ته درناوی وکړي. له دغه اکاډمۍ پرون نږدې ۴۵۰ محصلین فارغ شول چې د پولیسو په برخه کې یې عملي او اوږدې زده کړې کړې دي. ولسمشر غني دوی ته د وینا پر مهال وویل، چې صحرايي محکمې باید بندې کړل شي او افغان سرتېري دې د خلکو له وژلو ډډه وکړي. نوموړي د کوم ارګان نوم وا نه خیست او نه یې هم کومې پېښې ته اشاره وکړه، خو په خبره یې، هغه تورن کسان چې د جلب له لارې نیول کېدای شي، پر دوی د خاصو عملیاتو تر سره کولو ته څه اړتیا ده. ښايي د ولسمشر غني موخه په کابل کې وروستۍ پېښه وه، چې په هغه کې د ټاکنیز کمپاین پر مهال د ده ټیم ته نږدې کس آمر ستار ووژل شو.
ولسمشر غني وویل، پولس باید خپلو اصلي دندو ته راوګرځي او د خلکو باور خپل کړي. د ده په خبره، خلک د دې تمه لري چې پولیس د ټولنې رښتیني خدمتګاران وي او د دوی امنیت خوندي کړي. ولسمشر زیاته کړه، ولس نه غواړي چې پولیس یې فاسد وي او همدا راز پر دوی ډز وکړي. د ولسمشر غني په خبره، پولیس د وسلې د کارولو حق لري، خو په وینا یې تر وسلې مخکې باید په تدبیر مسایل حل کړي. غني وویل: «یونیفورم ته درناوی هغه وخت کېږي چې خلک وویني ستاسو عمل عادلانه، دقیق او سنجول شوی دی. د خلکو اعتماد تاسو په ښو اخلاقو، اغېزناک مدیریت او سم تشخیص تر لاسه کولی شی چې وشی کولی سیمه خوندي او امن کړی».
ولسمشر دغه راز پر پولیسو ټینګار وکړ، چې مجرمین او تورن ونه وژني. هغه وویل، پولیس او بل هېڅ امنیتي ارګان ان سر اعلی قومندان هم پر چا د ډز او د هغه د وژلو حق نه لري. هغه زیاته کړه: «حتی یو غل هم باید ونه وژني. د اعدام حکم یوازې د محکمې صلاحیت دی».
ښاغلي غني په کورنیو چارو وزارت کې پر اصلاحاتو هم ټینګار وکړ او زیاته یې کړه چې له دغه وزارته به بهرني لاسونه لنډوي. د ولسمشر په خبره، پولیس په ټولنه کې خورا مهم دي، نو د کورنیو چارو وزارت دنده ده چې دغه مهم ارګان په سمه توګه سمبال کړي. نوموړي د کورنیو چارو پر سرپرست وزیر غږ وکړ چې د پولیسو پر اکاډمۍ پانګونه ډېره کړي او همدا راز د افغانستان پولیسو ته یې اړتیا او امکانات پر وخت برابر کړي.
بلخوا د کورنیو چارو سرپرست وزیر مسعود اندرابي بیا وايي چې نوي روزل شوي او فارغ شوي پولیس به د کابل ښار د امنیت لپاره ګومارل کېږي. اندرابي وویل، دغو پولیسو خورا مسلکي روزنه لیدلې ده او د پولیسو په برخه کې لوړې زده کړې لري چې تر دې وروسته به د کابل ښار د امنیت لپاره ګومارل کېږي. هغه زیاته کړه: «زموږ د امنیتي پلان له مخې، دغه فارغ شوي پولیس به د کابل ولایت په دوو حوزو او یوه ولسوالۍ کې پر دنده وګمارل شي».
ولسمشر غني داسې مهال پر پولیسو او امنیتي ادارو د احتیاط غږ کوي، چې تر دې وړاندې یې هم د افغان ځواکونو په عملیاتو کې د ملکي وګړو پر مرګ ژوبله غبرګون ښودلی و. نوموړي ټينګار کړی و، چې امنیتي ځواکونه د تورنو او مجرمینو د وژلو حق نه لري او باید په عملیاتو کې له پوره احتیاطه کار واخلي، خو امنیتي ادارو تر اوسه په دې مسئله کې له اړین احتیاطه کار نه دی اخیستی.
