جان سوپکو: تر سولې وروسته وضعیت لپاره هېڅ ډول پلان او تګلاره نشته

د افغانستان پر بیا رغونه د امریکا د ځانګړې ادارې مشر جان سوپکو تازه په خپلو څرګندونو کې ویلي چې د افغانستان د سولې لپاره هڅې روانې دي، خو تر سولې وروسته وضعیت لپاره هېڅ پلان او ستراتيژي نشته ده. دده په وینا که د سولې مسئله یو اړخیزه کېږي، نو د بیا رغونې، سرتېرو د روزنې، امنیت د تامین، بېړنیو حالاتو او ورته نورو مواردو په اړه هېڅ راز تګلاره او پلان نه دی موجود. نوموړي دا مسئله د اندېښنې وړ بللې ده او په خبره یې امریکایي حکومت باید په دې اړه محتاط وي. سوپکو داسې مهال دغه څرګندونې کوي چې د امریکا ټول تمرکز د سولې له پروسې سره د طالبانو پر یو ځای کولو او دغه راز له افغانستان د خپلو سرتېرو پر ایستلو دی. افغان سیاسیون هم بیا وایي چې امریکا دې هر ګام مسوولانه واخلي او غیر مسوولانه وتل یا اقدام به دلته د کلونو لاس ته راوړنې له ګواښ سره مخ کړي.