سهیل شاهین: له امریکایي لوري سره د مذاکراتي ټېم خبرې نن هم دوام کوي

طالبانو او امریکايي لوري پر مهمو مسایلو خبرې کړې دي او نن به هم مذاکرات دوام کوي. د طالبانو د قطر دفتر ویاند سهیل شاهین وایي، چې د قطر دفتر مشر ملا برادر، شیرعباس ستانکزي او ملا متقي تېره ورځ د افغان سولې لپاره د امریکا له ځانګړي استازي زلمي خلیلزاد او په افغانستان کې د بهرنیو ځواکونو له عمومي قومندان جنرال سکاټ مېلر سره خبرې کړې دي. دده په وینا دوی پر راتلونکو اقداماتو غږېدلي دي. سهیل شاهین زیاتوي چې نن به هم په دوحه کې د امریکا او طالبانو د مذاکراتي ټیمونو ترمنځ خبرې روانې وي. نوموړي د سولې هوکړې د لاسلیک په اړه څه نه دي ویلي. ټاکل شوې وه چې د روان میلادي کال له پیل سره سم د طالبانو او امریکا ترمنځ د سولې هوکړه لاسلیک شي خو د اوربند پر سر اختلاف دغه هوکړه ځنډولې ده. اوس تازه طالبانو ویلي چې د روانې میاشتې تر پایه ښایي دواړه لوري هوکړه لاسلیک کړي.