طالبان وایي، دوی له خپل لوري د تاوتریخوالي کمولو طرحه جوړه کړې ده او اوس امریکا ته پکار ده چې دغه طرحه ومني. د طالبانو د قطر دفتر ویاند سهیل شاهین وایي، دوی یوازې د دې لپاره تاوتریخوالی کموي، چې امریکایي ځواکونه له افغانستانه ووځي. نوموړي په تازه مرکه کې ویلي چې له امریکا سره پر مهمو مواردو هوکړې ته رسېدلي دي او ډېره ژر به د سولې هوکړه لاسلیک شي. بلخوا افغان سیاستوال بیا پر دې باور دي چې د تاوتریخوالي کمول له سولې سره مرسته نه شي کولی او باید اوربند وشي.
د سولې له تودو خبرونو سره همهاله د اوربند او تاوتریخوالي کمولو موضوع هم د رسنیو سرټکی وي. په دې وروستیو ورځو کې ډېرو افغان چارواکو، سیاسیونو، طالبانو او بهرنیو هېوادونو د تاوتریخوالي کمولو او اوربند په اړه نظر څرګند کړی دی. اوس تازه په قطر کې د امریکا او طالبانو تر منځ خبرې روانې دي او د سولې هوکړې د لاسلیک پر راتلونکو اقداماتو خبرې کوي. د طالبانو ویاند سهیل شاهین تازه له یوې ایرانۍ رسنۍ سره مرکه کړې ده او په هغه کې یې ویلي چې دوی یوازې د امریکایي ځواکونو د وتلو لپاره تاوتریخوالی کموي او امریکايي لوری به هم په دې موده کې پر دوی برید نه کوي. هغه ویلي، دا د اوربند په مانا نه ده او دوی اوربند نه کوي.
شاهین ویلي، له امریکایي لوري سره پر څلورو مواردو هوکړې ته رسېدلي دي. لومړی دا چې ټول بهرني ځواکونه به له افغانستانه وځي. دویم دا چې د افغانستان له خاورې به د هېڅ هېواد پر وړاندې استفاده نه کېږي. درېیم دا چې تاوتریخوالی به کمېږي او څلورم دا چې بین الافغاني خبرې به پیلېږي. ده ټینګار کړی چې د دوی هدف له افغانستانه د امریکایي عسکرو ایستل دي. د شاهین په خبره، امریکايي عسکر افغانستان ته راغلي دي او دوی که د سولې او مذاکراتو او یا هم جګړې له لارې بهرنیان له افغانستانه وباسي، خو ښه به وي چې دا کار د مذاکراتو پر مټ وشي.
بلخوا په افغانستان کې هم دې مسئلې د افغان سیاسیونو غبرګونونه له ځان سره لرل. پخواني ولسمشر حامد کرزي وړمه ورځ ویلي وو، چې دوی د سولې ملاتړ کوي او حکومت باید د اوربند نه کېدل د سولې د راتګ په لار کې خنډ ونه ګرځوي. کرزي ویلي وو چې پر اوربند به په بین الافغاني خبرو کې بحثونه وشي او طالبان باید تیار کړل شي چې اوربند ته غاړه کېږدي. ده داسې ښودلې وه چې ګواکې حکومت د اوربند په پلمه غواړي د سولې د راتګ خنډ شي.
بلخوا اجرایه رییس عبدالله عبدالله هم په تازه څرګندونو کې ویلي وو، چې سوله د ټولو افغانانو هیله او ارمان دی او د یوه کس د نظر او یوه وزارت په اقداماتو دې د دې مهمې پروسې په اړه پرېکړه نه کېږي. عبدالله ټينګار کړی و، چې سوله باید انحصار نه شي او تر یوه وزارت یا د یوه کس تر فکر او نظر پورې محدوده نه شي. ده هیله څرګنده کړې وه چې ټول اړخونه په یوه خوله د سولې لپاره منظم اقدامات تر سره کړي.
بلخوا د ملي امنیت پخواني سلاکار حنیف اتمر هم تازه د سولې او اوربند په اړه خپل نظر څرګند کړی دی. نوموړي په یوه خپره کړې اعلامیه کې ویلي چې له طالبانو سره امریکا د سولې هوکړه لاسلیک کوي، نو په مقابل کې یې باید دا تظمین موجود وي چې طالبان به له افغان لوري سره هم هوکړې ته رسېږي. نوموړي د تاوتریخوالي کمول هم د اوربند او سولې یوه لار بللې وه، خو ټینګار یې کړی و چې طالبان دې بیا په بین الافغاني خبرو کې ارو مرو اوربند ته غاړه کېږدي.
د اوربند مسئله داسې مهال توده ده چې امریکایان هم له طالبانو د اوربند غوښتنه کوي، خو دغه ډله وایي چې دوی یوازې تاوتریخوالی کموي، د بهرنیو ځواکونو وتلو ته زمینه برابروي او تر هغه وروسته به په بین الافغاني خبرو کې پر سرتاسري اوربند خبرې کوي.
