ډونالډ ټرمپ: طالبان باید د تاوتریخوالي په کچه کې ښکاره کموالی راولي

د امریکا ولسمشر ډونالډ ټرمپ وایي په افغانستان کې د تاوتریخوالي په کچه کې باید ښکاره او د ډاډ وړ کموالی راشي. د امریکا ولسمشر ډونالډ ټرمپ له افغان ولسمشر اشرف غني سره په لیدنه کې ټینګار کړی چې طالبان باید له تاوتریخوالي لاس واخلي. دده په خبره ددغه ډلې په جګړو او تاوتریخوالي کې باید ښکاره او باور وړ کموالی راشي. نوموړي دغه راز ویلي باید ښکاره تعهد موجود وي چې دوی به جګړه پرېږدي او د سولې لار به خپلوي. ټرمپ داسې مهال دغه خبره کوي چې همدا اوس هم په قطر کې د طالبانو او امریکایي پلاوي ترمنځ د اوربند او یا تاوتریخوالي د کمولو پر سر اختلافات دي. طالبانو ویلي چې د روانې میاشتې تر پایه ښایي د سولې هوکړه لاسلیک شي او تر هغه وروسته به د بهرنیو ځواکونو د وتلو لپاره تاوتریخوالی کمېږي.